«Ուզում եմ հուշել, որ ձեր թշնամին մենք չենք». Նինա Կարապետյանց

«Հելսինկյան ասոցիացիա» իրավապաշտպան ՀԿ-ի նախագահ Նինա Կարապետյանցը «Նոյյան Տապան»-ի եթերում անդրադառնալով դատական համակարգի բացթողումներին, նշել է, որ հեղափոխությունից հետո այնտեղ ոչինչ չի փոխվել. «Այս համակարգն ինչ-որ մի պահի դուրս է գալու նոր իշխանությունների դեմ: Ես երկու տարի շարունակ ասում եմ, որ հեղափոխության տապալումը լինելու է արդարադատություն իրականացնող մարմինների ձեռամբ: Էն մարմինները, որ պետք է թևութիկունք լինեին հեղափոխությանը, տապալելու են քեզ, որովհետև նրանք հանցավոր կերպով կազմակերպված են, և տեսեք՝ ոնց են հանցավոր խմբի նման ամեն գնով տապալում այս իշխանություններին»,- կարծիք է հայտնել իրավապաշտպանը:

Հարցին՝ իրավապաշտպաններն այսօր պաշտպանվա՞ծ են, թե՞ իրենք էլ ունեն պաշտպանության կարիք, Ն. Կարապետյանցը պատասխանել է. «Անկեղծ ասած, հեղափոխությունից հետո ենթադրվում էր, որ ինչ-որ մի պահի իրավապաշտպանների կարիք առհասարակ չի լինելու, և մենք ստիպված ենք լինելու այլ ոլորտ ընտրել և այնտեղ տեղափոխվել: Ցավոք սրտի, այսօր իրավապաշտպաններն այնքան անպաշտպան են, ինչպես որ եղել են բոլոր ժամանակներում»:

Այնուհետև, դառնալով գործող իշխանություններին, Նինա Կարապետյանցն ասաց. «Ես, պարզապես, ուզում եմ հուշել, որ ձեր թշնամին մենք չենք, և ձեր կողքին կանգնած են լինելու այն մի փոքր խումբ իրավապաշտպանները, որոնք միշտ կանգնած են եղել տուժող կողմի կողքին՝ անկախ հետևանքներից»: