«Թեղուտում գյուղատնտեսությամբ զբաղվելն անհնար է և այլընտրանք չկա». Օլեգ Դուլգարյան

«Համայնքային համախմբման և աջակցության կենտրոն» ՀԿ ղեկավար Օլեգ Դուլգարյանը ֆեյսբուքյան իր էջում գրել է. «Թեղուտ գյուղում վերջերս տեղի ունեցած ակցիաները, ճանապարների փակումը, որի արդյունքում թեղուտցիներին խոստացան աշխատանքի ընդունել Թեղուտի հանքում, սոցիալական-տնտեսական լարումների թվին են պատկանում։
Գյուղում կարելի է ասել գյուղատնտեսությամբ զբաղվելը կարծես թե անհնար է և այլընտրանք չկա։ Նախ հողերն են արդեն սակավ, երկրորդն էլ մարդկանց գիտեմ, ովքեր տարիներ շարունակ աշխատել և կրթվել են, որպեսզի գյուղատնտեսական նշանակության արտադրանք ստեղծեն, արտահանեն, սակայն վերջում ներդրողները հրաժարվել են ներդրում անել՝ մտավախություն ունենալով, որ արտադրված ապրանքն էկոլոգիապես մաքուր չի լինի։
Սոցիալական լարումները կշարունակվեն և Շնողում և Թեղուտում այնքան ժամանակ մինչև այլընտրանքյին զբաղվածության ուղղություններ չզարգանան այդ և շրջակա գյուղերում։
Հանքն էլ, մի օր սպառվելու է և փակվելու, արդյունքում կմնան գյուղերը՝ առանց կայուն զբաղվածության և խաթարված շրջակա միջավայրով։
Նման սոցիալական լարումներից հետագայում խուսափելու համար անհրաժեշտ է, որ հենց այս պահից սկսած ընկերությունը, տեղական ինքնակառավարման մարմինների հետ մշակեն տվյալ բնակավայրերի այլընտրանքային զարգացման ուղղություններ, կատարեն ներդրումներ և այն մարդկանց, ովքեր չեն աշխատում հանքարդյունաբերությունում, ներգրավվեն զբաղվածության այլ ոլորտների մեջ՝ ապահովելով համայնքի, բնակավայրի երկարատև կենսունակությունը։
Ի վերջո բոլորին չեն կարող շարունակաբար հանքարդյունաբերությունում աշխատանքի ընդունել, կամ ընդունել ուրիշներին հանելու փոխարեն, կամ ընդլայնել ծավալները աղտոտվածության աշխարհագրության ընդլայնմամբ»։