«Մարտի 1-ի զոհերի իրավահաջորդները չեն մասնակցի դատական նիստերին». Տիգրան Եգորյան

«Մարտի 1»-ի զոհերի իրավահաջորդների ներկայացուցիչ, փաստաբան Տիգրան Եգորյանն այսօր ասուլիսի ժամանակ հայտնեց, որ իրավահաջորդները և վերջինների փաստաբանները դադարեցնում են իրենց ֆիզիկական մասնակցությունը «Մարտի 1»-ի գործով դատական նիստերին:

«Այժմ, երբ «Մարտի 1»-ի գործով նախաքննությունն, ըստ էության, դադարեցված է, իսկ դատաքննությունը վերածվել է թանկարժեք ժամավաճառության և ֆարսի, դատարանի բակում և դատական նիստերի դահլիճում տիրում է կամայականությունն ու թողտվությունը, որն ուղղված է Սահմանադրությամբ հռչակված արժեքների և իրավունքների դեմ և արժանանում է բարձր հանդուրժողականության, իսկ նախագահող դատավորն իր իշխանությունը կարողանում է, կարծես, իրականացնել միայն տուժողների իրավահաջորդների նկատմամբ, մենք դադարեցնում ենք մեր ֆիզիկական մասնակցությունն այդ անբովանդակ միջոցառմանը»,- ասաց Տիգրան Եգորյանը:
Հարցին, թե վաղվանից սկսած այլևս չե՞ն մասնակցելու դատական նիստերին և արդյոք դա չի՞ նպաստի այն ամենին, ինչ կատարվում է դատարանում, Եգորյանը պատասխանեց.
«Նախ մենք այլևս չենք դադարեցնում մեր մասնակցությունը և հույս ունենք, որ նշած բոլոր խնդիրները, դրանց հիմնական առանցքային մասը շատ արագ կթիրախավորվեն և դրանց լուծման ուղղությամբ կսկսվեն իրական գործընթացներ»: