«Լիդիան»-ը շարունակում է բռնություններ սանձազերծել Ամուլսարում. ՀԲՃ

Հայկական բնապահպանական ճակատը հայտարարություն է տարածել. ««Լիդիան»-ի նոր՝ VIP Guard Security պահնորդները օգոստոսի 6-ի լույս 7-ի գիշերը բռնի հարձակվել են Ամուլսարի պահպանությունն իրականացնող պահապանների վրա ու ծանր մարմնական վնասվածքներ են հասցրել։ Ամուլսարի պահապաններից մի քանիսը հոսպիտալացված են։
Գիշերվա հարձակումից ընդամենը ժամեր անց «Լիդիան»-ը վիդեոտեսանյութ է տրամադրել 24news հեռուստաալիքին, որն էլ մոնտաժված այս տեսանյութը տարածում է, իբր՝ Ամուլսարի պահապանները քարեր են նետում «Լիդիան»-ի բեռնատարի ուղղությամբ։
Տակտիկան հասկանալի է՝ հարձակվել ծեծել, կատաղացնել ու հրահրել պատասխան քայլ, նկարել դա, մոնտաժել, ու տարածել մանիպուլյացիան։
Այս մանիպուլյատիվ վիդեոն տարածում են լիդիանականները, դրանց սպասարկողներն ու նույնիսկ որոշ պաշտոնյաներ՝ առանց ամաչելու բռնելով բռնարարների կողմը։
«Լիդիան»-ը շարունակում է բռնություններ սանձազերծել Ամուլսարում ու մնում է առանց պատասխանատվության»: