«Ղալումյանը մեկ տարի պաշտոնավարում է` առանց գեթ մեկ քվե ունենալու». Սարգիս Ալեքսանյան

ԱԺ «Լուսավոր Հայաստան» խմբակցության պատգամավոր Սարգիս Ալեքսանյանը ֆեյսբուքյան իր էջում գրել է. «Լրացավ մեկ տարին, ինչ Տավուշի մարզկենտրոնի՝ Իջևանի համայնքապետ է Հայկ Ղալումյանը:

Ինչպես հայտնի է, պարոն Ղալումյանը քավոր-սանիկ կապով պայմանավորված նշանակվել է համայնքի ղեկավարի ժամանակավոր պաշտոնակատար և մեկ տարի շարունակ պաշտոնավարում է առանց գեթ մեկ քվե ունենալու իր թիկունքում:

Իհարկե, կարող են տարբեր կոմբինացիաներ կիրառելով խոշորացնել համայնքը, որպեսզի ստանան ցանկալի ընտրական արդյունքը: Կարելի է պատկերացնել, թե այս իրավիճակում իշխանության համար որքան սկզբունքային է հաղթելը տեղական ընտրություններում, բայց հույս ունեմ, որ իջևանցիները կգնահատեն իրավիճակը՝ հաշվի առնելով այս աննախադեպ իրողությունը, երբ մեկ տարի շարունակ մարզկենտրոնը ղեկավարում է քվե չստացած և կենտրոնական իշխանության հայեցողությամբ նշանակված անձը»: