«Ֆրանսիան հստակ աջակցում է Հայաստանին»․ Հայկ Մարտիրոսյան

Քաղաքագետ Հայկ Մարտիրոսյանը ֆեյսբուքյան իր էջում գրել է. «Մի քանի անգամ Ֆրանսիայի հասցեին բացասական արտահայտվելով Ալ Ջազիրային տված իր հարցազրույցում՝ Ալիևն իրականում մատնեց, որ այս հարցում Ֆրանսիայից եկող ստվերային սպառնալիք է տեսնում։ Երեկ Ալիևն ուղղակիորեն վիրավորեց թե՛ Ֆրանսիային, և թե՛ անձամբ նախագահ Մակրոնին։
Միաժամանակ լարվում են հարաբերությունները Գերմանիայի հետ։ Իսրայելում նույնպես այլևս քաղաքական շռջանակներում լսվում են կոչեր՝ չաջակցելու Թուրքիային։ Ու մինչ Իսրայելն ու Գերմանիան հայկական կողմին ուղղակի աջակցություն չեն ցուցաբերի, Ֆրանսիան վստահորեն այն հանգրվանում է, երբ ռազմատեխնիկական օգնությունն ուղղակիորեն հնարավոր է։ Դրա համար անհրաժեշտ է չզգուշանալ որևէ դաշնակցի սպասվելիք խանդից և ուղղակիորեն դիմել Ֆրանսիային։
Ռազմաճակատում մեր որդիներն են զոհվում, իսկ քաղաքական բոլոր նպատակահարմարություններն այլևս պետք է մի կողմ թողնել։
Գոյամարտի ժամանակ քաղաքականությունը պետք է սպասարկի ռազմական բաղադրիչին, և ոչ երբեք՝ հակառակը։ Ժամն է դիմելու Ֆրանսիական Հանրապետությանը՝ Հայաստանի Հանրապետությանը ռազմա-տեխնիկական՝ այդ թվում զենք-զինամթերքի տեսքով օգնություն տրամադրելու խնդրանքով։
Գուցե և մենք ունակ ենք միայնակ կռվելու ոսոխի դեմ, բայց ոչ մի պետություն այդ քայլին փորձում է չդիմել։ Հատկապես ուժեղագույնը՝ Միացյալ Նահանգները, երբեք միայնակ չի պատերազմում։
Դա անասելի ծանր բեռ է յուրաքանչյուր պետության համար, հատկապես՝ փոքրիկ և աղքատ և միայն ոգով հարուստ մի անծով երկրի, որ տարածաշրջանային մի հսկայի և մեկ այլ ֆինանսա-ռազմական հարուստ կազմավորման դեմ է պատերազմում։
Դիմե՛ք և կստանա՛ք»։