«Զենքն սպանում է մարդուն ֆիզիկապես, առցանց զենքերը մարդու մեջ սպանում են անհատին». Լիլիթ Բլեյան

Երգչուհի Լիլիթ Բլեյանը ֆեյսբուքյան իր էջում գրել է. «Հիմա՝ ոչ մշակութային լուրեր
Քաղաքացիականներին թիրախավորող զենքերից երբ խոսում ենք, հետո, շատ հետո, երբ էս ամենը վատ երազի պես մնա հետևում, երբ մեր վերքերը գոնե մի քիչ նորոգած լինենք, խնդրում եմ, եկեք ամեն ինչ անենք, որ ուղեղի լվացման առցանց գործիքներն իրենց վտանգավորությամբ հավասարեցվեն զանգվածային ոչնչացման զենքերին։
Զենքը սպանում է մարդուն ֆիզիկապես, իսկ էս առցանց զենքերը մարդու մեջ սպանում են առողջ, ինքնուրույն վերլուծելու ունակությունը, մարդու մեջ սպանում են անհատին։ Շատ քչերն են էս պահին պատկերացնում վտանգավորության աստիճանը, բայց բոլորս ենք «վայելելու» հետևանքները։
«Ես մտածում եմ, ուրեմն ես կամ» սկզբունքն էսօրվա սոցցանցային աշխարհում այլևս չի գործում, քանի որ անհատական վերլուծական միտքը գրեթե վերջնականապես զիջել է իր տեղը զանգվածային հիպնոտիկ պատրաստի «մտքերին»։
Սա զանգվածային ուղեղասպանություն է, որը մի օր պիտի նույնպես հանցագործություն համարվի։ Ու էդ առցանց «հեռահար» զենքերի կառավարման կոճակներին տիրապետող մարդիկ պիտի սկսեն զգալ իրենց պատասխանատվության չափը։ Պիտի սկսեն վախենալ իրենց վերցրած էդ ծանր պատասխանատվությունից։ Խաղ չի սա։ Բանակի հետ հավասար մասնակցում են պատերազմին։ Պատասխանատվություն են կրում մարդկային կյանքերի համար։
Բարի գիշեր, խաղաղությունը թող գա, ու բոլոր զենքերը լռեցնենք հերթով՝ ի շահ կյանքի ու առողջ բանականության»։