«Կորոնավիրուսի դեպքերն աճում են. ի՞նչ անել». Կարինե Հարությունյան

Լրագրող Կարինե Հարությունյանը ֆեյսբուքյան իր էջում գրել է. «Կորոնավիրուսի դեպքերն աճում են ոչ թե որ հիմա սկսել են փողոցում դիմակ չդնել /առաջ էլ դնողը դնում էր, չդնողը չէր դնում, էլ չասեմ, որ փողոցում դիմակը անիմաստ է, եթե փակ տարածքում՝ ռեստորան և այլն 30-40 սմ-ի վրա մարդիկ ուտում են, խոսում, շնչում իրար վրա/, այլ ուրիշ պատճառներով: Հայտնի է, որ ուլտրամանուշակագույն ճառագայթները և բարձր ջերմաստիճանը թուլացնում են վիրուսը, իսկ երբ վիրուսի ուժը թուլանում է, մարդու վրա քիչ է ազդում, կամ չի ազդում: Ոմանք թեթև են տանում, իսկ անախտանիշ վարակակիրներն ավելի շատ են լինում: Գումարած՝ տաք եղանակին մարդիկ ավելի շատ են դրսում՝ բացօթյա սրճարաններում, գրասենյակների պատուհանները բաց են, էլ չասած՝ ուսումնական հաստատությունների արձակուրդը:
Ինչո՞ւ են հիմա թվերը աճում: Եղանակը ցրտում է, ուսումնական հաստատություններում լիարժեք դասապրոցես է, մանկապարտեզներն աշխատում են, արդեն նախընտրելի են փակ սրճարանները, օֆիսներում ավելի քիչ է օդափոխություն կատարվում:
Ի՞նչ անել: Կրթական գործընթացը դարձնել կրկին հեռավար՝ հաճելի կամ արդյունավետ է դա, թե ոչ: Թողնել միայն մանկապարտեզները՝ հաշվի առնելով աշխատող ծնողների հանգամանքը: Կոչ անել, որ չաշխատողները իրենց երեխաներին մանկապարտեզ չտանեն: Գոնե այսքանը, եթե ոչ՝ դեպքերի էլ ավելի աճի դեպքում, իսկ որ դա լինելու է, կասկած չկա, ստիպված ենք լինելու կրկին փակել նաև սրճարան-ռեստորանները, որն իհարկե հարվածելու է առանց այդ էլ գարնանը քովիդի պատճառով տուժած տնտեսությանը և, մասնավորապես, բիզնեսի այս ճյուղին»: