«Ֆրանսիայի դեմ Ադրբեջանի դեմարշը պետք է շատ կոշտ հակազդեցության հանդիպի». Մ. Նահապետյան

«Քաղաքացու որոշում» սոցիալ-դեմոկրատական կուսակցության անդամ Միքայել Նահապետյանը ֆեյսբուքյան իր էջում գրել է. «2016թ-ի ապրիլյան պատերազմը ծնեց հրամայական, որ հաջորդ անգամ պետք է համանախագահները կարողանան հստակ ֆիքսել, թե ով է հարձակվողը։ Այդ հրամայականի բերումով ձևավորվեցին Վիեննայի և Սանկտ-Պետերբուրգի պայմանավորվածությունները, որոնք պիտի թույլ տաին պարզել, թե ով է սկսել։ Հետագայում Ադրբեջանը խախտեց այդ պայմանավորվածությունները ու թույլ չտվեց մոնիթորինգի և դեպքերի հետաքննության մեխանիզմ ներդնել։
Ադրբեջանն այս պայմանավորվածությունը խախտելիս հստակ գիտեր, որ հաջորդ պատերազմում միջազգային հանրությունը պետք է հատակ ասի թե ով է սկսել պատերազմը՝ անկախ նրանից այդ մեխանիզմները դրված կլինեն, թե ոչ։ Ֆրանսիան հիմա կատարում է այդ պարտավորությունը՝ որպես համանախագահ, իսկ եթե Ադրբեջանը դժգոհ է, որ Ֆրանսիան այդ հարցը չի հետաքննել Ադրբեջանի հետ համաձայնցված ֆորմատով, ապա թող հետ նայի ու վերագնահատի, թե որքանով էր խոհեմ Վիեննայի ու Սանկտ-Պետերբուրգի պայմանավորվածություններից հրաժարվելը։ Չէ որ դրանք էին հենց ճշմարտությունը պարզելու փոխադարձ համաձայնեցված միջոցը, չէ որ նաև Ադրբեջանն է այս օրերին նշում, որ ԵԱՀԿ ՄԽ համանախագահները երեսուն տարի ոչ մի հասցեական գնահատական չեն տվել։ Հիմա տալիս են։
Սա մանկապարտեզ չէ, որ խաղում պարտվելուց հետո սկսես վիճարկել կանոնները՝ հասուն մարդիկ այդպես չեն անում»։