«Հավատարիմ ենք խաղաղ կարգավորման սկզբունքին և պատրաստ ենք վերսկսել խաղաղության գործընթացը». Փաշինյան

Եվրասիական միջկառավարական խորհրդի նեղ կազմով նիստից հետո կայացել է ԵԱՏՄ երկրների վարչապետների ընդլայնված կազմով հանդիպումը։

Հայաստանի վարչապետը հանդես է եկել ելույթով, որում ասել է. «Մենք հավատարիմ ենք Լեռնային Ղարաբաղի հակամարտության խաղաղ կարգավորման սկզբունքին և պատրաստ ենք վերսկսել խաղաղության գործընթացը՝ վերջին օրերին ԵԱՀԿ Մինսկի խմբի համանախագահ երկրների նախագահների և ԱԳ նախարարների հայտարարություններին համապատասխան:
Մեր երկիրն ու մեր ժողովուրդն այսօր դժվար ժամանակներ են ապրում: Արդեն երկու շաբաթ է՝ Թուրքիայի աջակցությամբ Ադրբեջանը շարունակում է սպառազինությունների տարբեր տեսակների կիրառմամբ լայնամասշտաբ հարձակումը ոչ միայն Ղարաբաղի, այլև Հայաստանի դեմ: Մենք դա գնահատում ենք որպես ադրբեջանա-թուրքական սպառնալիք հայ ժողովրդի դեմ: Մեր քաղաքներն ու գյուղերը գնդակոծվում են, կան բազմաթիվ զոհեր և վիրավորներ: Հատկապես տուժել է Ղարաբաղի մայրաքաղաք Ստեփանակերտը, որի բնակչությունը հումանիտար աղետի շեմին է: Կոնֆլիկտին ներգրավված են Սիրիայից վարձկաններ և գրոհայիններ: Այդ փաստը հաստատել են նաև ԵԱՀԿ Մինսկի խմբի համանախագահ երկրները, ինչպես նաև բազմաթիվ հեղինակավոր ԶԼՄ-ներ»:

Ավելի վաղ հայտնել էինք, որ նիստին մասնակցում են Եվրասիական տնտեսական հանձնաժողովի (ԵՏՀ) Կոլեգիայի նախագահ Միխայիլ Մյասնիկովիչը և ԵԱՏՄ անդամ երկրների կառավարությունների ղեկավարները՝ Ռուսաստանի Դաշնության կառավարության նախագահ Միխայիլ Միշուստինը, Բելառուսի Հանրապետության վարչապետ Ռոման Գոլովչենկոն, Ղազախստանի Հանրապետության վարչապետ Ասկար Մամինը: Ղրղզստանի Հանրապետության կողմից նիստին մասնակցել է Հայաստանի Հանրապետությունում Ղրղզստանի արտակարգ և լիազոր դեսպան Ալիկբեկ Ջեկշենկուլովը։