«Թուրքիան գնում է Ադրբեջանում իր ռազմական ներկայությունն օրինականացնելու ճանապարհով». Արման Աբովյան

ԱԺ ԲՀԿ-ական պատգամավոր Արման Աբովյանը ֆեյսբուքյան իր էջում գրել է․ «Ինչպես և նշել էինք, Թուրքիան, փաստորեն, գնում է Ադրբեջանում իր ռազմական ներկայությունն օրինականացնելու ճանապարհով:

Այն, որ թուրք զինվորականները վաղուց են գտնվում Ադրբեջանում, և հենց իրենք են ղեկավարում ադրբեջանական բանակի գործողություններն Արցախի ուղղությամբ, զինում են ամեն կերպ, օգտագործում են իրենց ավիացիան (F 16), տեղափոխում են ահաբեկիչներ Մերձավոր Արևելքից Հայաստանի և Արցախի դեմ պատերազմի համար, սրանք փաստեր են, որոնց հետ կարող են վիճել միայն ադրբեջանցի կա՛մ այլ վճարված քարոզիչ, կա՛մ էլ պարզապես ապուշը:

Այժմ էլ սկսվում է Արցախում թուրքական ներխուժման օրինականացման գործընթացը:

Այսպիսով, Թուրքիայի խորհրդարանը շատ ակտիվորեն քննարկում է Ադրբեջանի տարածք իր զորքերի պաշտոնական մուտքի թույլտվության հարցը, իսկ դա, ըստ էության, իրավաբանորեն օրինականացնելու է թուրքական ուժերն արցախյան ճակատում:

Այսինքն՝ հիմա մենք տեսնում ենք, թե ինչպես է Թուրքիան իրականում փորձում այս պատերազմում ևս իր ռազմական մասնակցության սիրիական մոդելը կիրառել:

Իսկ դա ոչ մի դեպքում չի կարելի թույլ տալ»։