«Սա հենց ցեղասպանության քաղաքականություն է, ոչ թե պատերազմ». ԿԳՄՍ փոխնախարար

ԿԳՄՍ փոխնախարար Ժաննա Անդրեասյանը ֆեյսբուքյան իր էջում գրել է․ «Ադրբեջանի կողմից քաղաքացիական ենթակառուցվածքները, մշակութային կառույցները, կրթական հաստատությունները թիրախավորելն ի ցույց է դնում շատ պարզ բաներ։
Պրագմատիկ տեսանկյունից, զուտ ռազմական իրավիճակի համար դրանց ոչնչացումը կարծես էական չի, էականը ռազմական օբյեկտների թիրախավորումը պիտի լիներ, որպեսզի հակառակորդիդ վնասազերծես, կրճատես նրա կարողությունները՝ պատասխան հարված հասցնելու, հարձակվելու։
Դրա փոխարեն, որ պատերազմական վիճակում կարծես ամենաուղիղ ռազմավարությունն է, Ադրբեջանն անում է այլ բան. դպրոց ու շենք ոչնչացնելով փորձում է վախ ու տագնապ սերմանել, որ մարդիկ հասկանան՝ թիրախի տակ իրենք են և թողնեն իրենց բնակավայրերը։ Հետո էլ, երբ հանկարծ մտքներով անցնի վերադառնալ, չկարողանան դա անել, որովհետև ապրելու պայմաններ չեն ունենա իրենց բնակավայրերում։
Սա հենց ցեղասպանության քաղաքականություն է, ոչ թե պատերազմ։ Սա Արցախում բնակվող մարդկանց իրենց տներից զրկելու, այդեղ ապրելու մտքից զրկելու քաղաքականություն է։ Այս իմաստով Ադրբեջանի ձեռնարկած պատերազմի իրական նպատակը ոչ այնքան տարածք վերցնելն է ռազմի դաշտում և ուղիղ կռվով, այլ տարածք վերցնելն է՝ դուրս մղելով էնտեղ ապրող մարդկանց։
Չեն հաջողելու»: