«Այս ցեղասպանության համար պատասխանատու է նաև Իսրայելի իշխանությունը». Արցախի նախագահ

«Ապրիլյան պատերազմի ժամանակ էլ Իսրայելի իշխանությունը ոչ միայն տեղյակ էր, որ Ադրբեջանն իսրայելական զենքերը ոչ թե պաշտպանության, այլ հարձակման նպատակով է օգտագործում, այլև Իսրայելից եկած մասնագետներին էին օգտագործում։ Դրա համար, եթե Իսրայելի իշխանությունն ասի՝ տեղյակ չենք, հերթական ծաղրանքն է մարդկության հանդեպ»,- ասուլիսի ժամանակ հայտարարեց ԱՀ նախագահ Արայիկ Հարությունյանը:

Նրա խոսքով՝ Իսրայելի իշխանությունը տեղյակ է իրավիճակի մասին, և այսօր էլ նրանք շարունակում են զենք մատակարարել Ադրբեջանին. «Այս ցեղասպանության համար պատասխանատու է նաև Իսրայելի իշխանությունը, որն ապրել է ցեղասպանություն։ Աշխարհում փողն է տիրում, և Իսրայելի ղեկավարության այդ քայլերը հերթական ապացույցն են, որ փողի համար ոտնահարում են ոչ միայն մարդկային, այլև Աստծո պարտադրած արժեքները»,- նշեց նախագահը: