«Եթե Հայաստանը պետք է ճանաչի Արցախի անկախությունը և մնա միայնակ, ապա դա անիմաստ է». Էդմոն Մարուքյան

«Ես կարող եմ ասել, թե ես ինչ եմ ասել։ Ես ասել եմ, որ եթե Հայաստանը պետք է ճանաչի և մնա միայնակ այդ ճանաչման հետ, ապա դա անիմաստ է։ Եթե մենք կարողանանք դիվանագիտական աշխատանքով հասնել նրան, որ Արցախի անկախությունը ճանաչեն մեզ հետ միաժամանակ, օրինակ, Մինսկի խմբի համանախագահ երկրներից որևէ մեկը, և այլ երկրներ, այդ պարագայում դա իմաստ կունենա։ Այս փուլում այդ հարցը քննարկվում է։ Դա ուղերձ է արտաքին աշխարհին և դա շատ ճիշտ է... Շատ հավանական է, որ Ֆրանսիան, Ռուսաստանը ճանաչեն Արցախը՝ լավ աշխատանքի արդյունքում։ ԱՄՆ-ին չէի ասի, որովհետև այնտեղ հիմա շատ խառը վիճակ է»,-ներկայացնելով վարչապետի հետ հանդիպման ընթացքում իր հնչեցրած կարծիքը, ասաց ԼՀԿ խմբակցության ղեկավար Էդմոն Մարուքյանը:

Հիշեցնենք՝ վարչապետ Նիկոլ Փաշինյանը երեկ հանդիպում է ունեցել ԱԺ խորհրդի անդամների՝ խորհրդարանի նախագահ Արարատ Միրզոյանի, խմբակցությունների ղեկավարների և մշտական հանձնաժողովների նախագահների հետ: Հանդիպմանը մասնակցել է նաև Արտաքին գործերի նախարար Զոհրաբ Մնացականյանը: