«Թուրքիան խրախուսում է և հրահրում Ադրբեջանի ռազմական գործողությունները»․ Մայքլ Յենսեն

Ստրասբուրգում տեղի է ունեցել Եվրոպայի խորհրդի խորհրդարանական վեհաժողովի ընդլայնված նիստը՝ վիդեո-կոնֆերանսի ձևաչափով: Հիմնական թեմաներն են եղել կորոնավիրուսի համավարակի ազդեցությունը և արհեստական բանականության մարտահրավերները:
Ըստ ԵԽԽՎ-ի կայքի՝ նիստի մասնակից անդամները խնդրել են ավելացնել ևս 2 թեմա, որոնցից մեկը վերաբերել է Թուրքիայում քաղաքական և սոցիալական ընդդիմության ճնշմանը, մարդու իրավունքների և հիմնարար ազատությունների պաշտպանությանը: Իսկ երկրորդ թեման վերաբերել է Հայաստանի և Ադրբեջանի միջև զինված հակամարտությանը:
Լեռնային Ղարաբաղի հակամարտության վերաբերյալ քննարկումը բացել է Դանիայի ներկայացուցիչ Մայքլ Յենսենը: Նա շեշտել է հակամարտության խաղաղ կարգավորման անհրաժեշտությունը:
«Հայաստանի և Ադրբեջանի միջև մարտական գործողությունները մեզ բոլորիս համար մեծ մտահոգության առիթ են: Գուցե մենք ՄԱԿ-ը կամ ԵԱՀԿ Մինսկի խումբը չենք, բայց երբ Եվրոպայի խորհրդի 2 անդամ պետություն միմյանց դեմ զինված հակամարտության մեջ են ներգրավված, դա պետք է վերաբերի մեր վեհաժողովի յուրաքանչյուր անդամի: Ցանկացած անդամ պետության պարտավորությունն է առկա տարաձայնությունները լուծել խաղաղ ճանապարհով և խուսափել ուժի կիրառումից: Ես ուրախ եմ, որ ուրբաթ երեկոյան ՌԴ-ի միջնորդությամբ պետությունները հրադադարի պայմանավորվածություն են ձեռք բերել: Չնայած այն բանին, որ մենք, ցավոք, լսում ենք, որ հրադադարի ռեժիմը լիովին չի պահպանվում, միևնույն ժամանակ այն հույսեր է արթնացնում: Ես դատապարտում եմ այն փաստը, որ Թուրքիայի իշխանությունները, որոնք մեծ ազդեցություն ունեն Ադրբեջանի կառավարության վրա, այդ ազդեցությունը չեն օգտագործում իրավիճակը հանդարտեցնելու և կողմերին բանակցային սեղանի շուրջ վերադարձնելու համար, այլ հակառակը, բացահայտ խրախուսում են և հրահրում Ադրբեջանի ռազմական գործողությունները»,- ասել է ԵԽԽՎ դանիացի պատգամավոր Մայքլ Յենսենը: