«Մենք դեռ տաք ենք, չենք հասկանում». Հայկ Մարտիրոսյան

Քաղաքագետ Հայկ Մարտիրոսյանը ֆեյսբուքյան իր էջում գրել է. «Մարդկության պատմության մեջ առաջին անգամ փաստորեն մի հինավուրց ժողովուրդ ռազմական դաշինքի մաս է դարձել որ կռվող զորք ու հաղթող զենք ստանալու փոխարեն, ձեռք է բերել դաշնակից, որ թշնամու շահերն առաջ տանող և սեփական «խաղաղապահ» ուժերը հօգուտ դաշնակցի թշնամու՝ դաշնակցի տարածքում տեղադրելու՝ կողքից հետևում է իրավիճակին:
Մենք դեռ տաք ենք, չենք հասկանում, բայց եթե այս հանգրվանում, երբ անցած են բոլոր գծերը, երբ այրված են բոլոր կամուրջները, երբ արդեն պատահել է վատթարագույնը՝ լայնածավալ պատերազմ և Հայաստանը փաստացի լինելով մեծ ռազմական դաշինքի անդամ՝ ոչ միայն բոլորովին չունի նրա աջակցությունը, այլև նրա դաշնակիցների կողմից տարվում է իր շահերին հակառակ գիծ, չունի այլ ընտրություն՝ քան պատերազմից հետո արմատականորեն վերանայել սեփական ողջ աշխարհայացքն ու ռազմական դոկտրինը:
Մենք ինքներս այլևս նույնը մնալ չենք կարող: Դրա իրավունքը մենք չունենք:
Վաղը նոր Հայաստան է լինելու: Իսկ հին Հայաստանի քաղաքական փիլիսոփայությունն ու հասարակության հոգեբանությունը պետք է թողնել այս պատերազմի կրակներում՝ այրվելու՝ մինչ կատարյալ մոխրացում և անվերադարձ անէացում»: