«Մի օր բոլորի դռները կփակվեն երեսիդ՝ դիմացդ շպրտելով հին այլընտրանքը՝ թրքական սա՞լ, թե՞ ռուսական մուրճ». Վարդ Սիմոնյան

Լրագրող Վարդ Սիմոնյանը ֆեյսբուքյան իր էջում գրել է. «Գոնե մի հարցում գեոօլիգարխները չունեն որևէ տարաձայնություն՝ աշխարհին պետք են պատերազմական գոտիներ, անվերջ մխացող վառոդի տակառներ, որ խաղաղության տարածքի ագրեսիան դուրս բերեն, նրա նյարդային բալաստը հողանցեն։ Միայն այդպես կարող է ապրել հարևան խաղաղության տարածքը։ Միայն այդ տեկտոնական ցնցումներով է հնարավոր կանխել այն հզոր երկրաշարժը, որ սպառնում է աշխարհի երթևեկը հսկող և կեղծ դեկլարացիաների տակ թաքնվող միջազգային պետավտոտեսուչների: Մենք կարմիր խոռոչում ենք։ Միջազգային համայնքն ամեն ինչ ճիշտ է չափել և կտրել․ կրթության ու գիտության հասանելիքը կտաս ճակատին ու թիկունքն անգրագետ կթողնես, ամենալավ հարևանի ու բարեկամի զահլեն կգնա քո կռվազանությունից ու մի օր բոլորի դռները կփակվեն երեսիդ՝ դիմացդ շպրտելով հին այլընտրանքը՝ թրքական սա՞լ, թե՞ ռուսական մուրճ։
Ահա ինչու էր պետք վերջապես իր անկախությունը վերագտած ժողովրդի մեջքից կապել պատերազմի ծանր քարը՝ պատերազմի իշաբեռով ո՞ւր պիտի հասնես: Իսկ մենք մեր դիվանագիտական նայիվությամբ դեռ նախորդ դարասկզբի հայն ենք և ծեծում ենք հենց նրանց դուռը, որտեղ գրվում է պատերազմի հրձիգ երկրների ճակատագիրը, արդարամտություն ենք հայցում հենց նրանցից, ովքեր գլադիատորների են վերածում ամբողջական ժողովուրդների։
Հայաստանին ոչ մեկը դուրս չի բերելու այս ականապատ, թիրախ զոնայից, Հայաստանը միայն սեփական մազերից բռնվելով կարող է դուրս պրծնել այս մահաբեր խոռոչից: Նա, ով հասկանում է ինչ է ուզում, նա գիտի ինչպես հասնել իր ուզածին: Նա, ով հասկանում է իրերի դրությունը, նա արդեն հաղթել է։ Պատերազմին՝ #ՀաղթումԵՆՔ Պատերազմին»: #ՀաղթելուԵՆՔ