«Շեխեր, Ջիվանիկ, Ազոխ և հարակից այլ գյուղերում մարտերը շարունակվում են»․ Ա․ Հովհաննիսյան

«Այսօր, վաղ առավոտյան, ադրբեջանական զինված ուժերը, որոնց հետ միացած են ահաբեկչական տարբեր կազմակերպություններ, ինչպես նաև այլ պետությունների ԶՈՒ-երի ստորաբաժանումներ, հարավ-արևելյան ուղղությամբ լայնամասշտաբ հարձակում ձեռնարկեցին մի քանի ուղղություններով՝ միաժամանակ հրետակոծելով և ռմբակոծելով Արցախի քաղաքները»,- այսօրվա ճեպազրույցում ասաց ՊՆ ներկայացուցիչ Արծրուն Հովհաննիսյանը՝ տեղեկացնելով, որ արդեն կա պաշտոնական հաղորդագրություն՝ քաղաքացիական անձանց մասին։

Վերջինի խոսքով՝ ողջ օրվա ընթացքում հրոսակախմբերին չի հաջողվել ճեղքել ռազմաճակատը․ «Չնայած որոշ տեղերում թվացյալ հաջողություն են ունեցել, բայց մեր ստորաբաժանումներին հաջողվել է հակագրոհով հետ վերցնել և վերականգնել առաջնագիծը»,- շեշտեց նա՝ հավելելով, որ նույն ժամանակահատվածում Հադրութից հյուսիս գտնվող գյուղերի անտառների հատվածում շարունակվել են դիվերսիոն խմբերի փնտրման և ջախջախման գործողությունները։ Որոշ դիվերսիոն խմբեր, նույնիսկ թողնելով մեքենաներ, փախել են, բայց մի քանի գյուղերում՝ Շեխեր, Ջիվանիկ, Ազոխ և հարակից այլ գյուղերում, մարտերը շարունակվում են մինչ այս պահը։