«Սրանք, ըստ միջազգային իրավունքի, ոչ թե ռազմագերիներ են, այլ՝ քրեական հանցագործության մեջ մեղադրվողներ». Հայկ Մարտիրոսյան

Քաղաքագետ Հայկ Մարտիրոսյանը ֆեյսբուքյան իր էջում գրել է. «Ձերբակալվել է երկրորդ սիրիացի ահաբեկիչը: Հստակ արձանագրենք ևս մեկ անգամ, որ ահաբեկիչ վարձկանները չեն կարող որակավորվել որպես ռազմագերի:
Ինչպես Հայաստանի հատուկ ծառայություններին հայտնել է ահաբեկիչն, ինքը Ջիսր Ալ Շուղուր քաղաքից է:

Նշեմ, որ Ջիսր Ալ Շուղուրը հայտնի դարձավ սիրիական պատերազմի ժամանակ, որի խոշոր հիվանդանոցում մի քանի տասնյակ օր անհավատալի հերոսական ինքնապաշտպանություն իրականացրին այնտեղ ապաստանած սիրիական բանակի մի խումբ զինվորներ, որոնց մի մասին հաջողվեց անվեհեր մարտով դուրս գալ շրջափակումից:

Քաղաքն Իդլիբում է: Իդլիբը հիմա շարունակում է մնալ ռեբրենդինգի ենթարկված Ալ Ղաիդայի տիրապետության տակ:

Որպես վարձկան-ահաբեկիչներ՝ սրանք, ըստ միջազգային իրավունքի, ոչ թե ռազմագերիներ են, այլ՝ քրեական հանցագործության մեջ մեղադրվողներ: Պաշտպանված չեն Ժնևի կոնվենցիաներով և չպետք է փոխանակվեն կամ երբևէ հանձնվեն թշնամուն: Պետք է դատապարտվեն բարձրագույն պատժի և բանտարկված մնան մինչև կյանքի վերջ:

Ցավոք սրտի, Հայաստանում չկան ռազմական տրիբունալներ, որոնք մահապատիժներ կսահմանեին»: