«Դաժանություններ, խոշտանգումներ պարունակող տեսանյութեր են ուղարկվում հայ օգտատերերին»․ Արման Թաթոյան

«ՄԻՊ-ի աշխատակազմի ծանրաբեռնվածությունն այս տարի շեշտակի ավելացել և ավելանում է: Մենք կանխատեսում ենք, որ հաջորդ տարի էլ ավելի է ավելանալու՝ թե՛, առհասարակ, գործունեության ոլորտների ընդլայնմամբ պայմանավորված և թե՛՝ ստեղծված իրավիճակով»,- այս մասին մարդու իրավունքների պաշտպանության և բյուջետային հարցերի հանձնաժողովների համատեղ նիստին ասաց ՄԻՊ Արման Թաթոյանը։
Անդրադառնալով սեպտեմբերի 27-ից ադրբեջանական զինված ուժերի կողմից հարձակմանը՝ Թաթոյանը շեշտեց, որ դրանք մտադրված թիրախային հարձակումներ են՝ թե՛ Հայաստանի, թե՛ Արցախի խաղաղ բնակավայրերի նկատմամբ։
«Ակնհայտ է, որ հակառակորդը մտադրված է հասցնել այնքան վնաս, որքան հնարավոր է՝ առաջին հերթին խաղաղ բնակավայրերի ուղղությամբ»,- ասաց նա։
«Բոլորիս հայտնի է, որ Ադրբեջանում հայատյացությունն ունի պետական աջակցություն և խրախուսվում է քաղաքական բարձր մակարդակով, բայց այս հարձակումներն ուղեկցվում են մեծ համակարգվածությամբ՝ մշակված տեսանյութերով, որ տարածվում են թուրքական և ադրբեջանական աղբյուրներից»,- հայտարարեց Թաթոյանը։
«Շատացել են այն տեսանյութերը, որոնք դաժանություններ, բռնություններ և խոշտանգումներ են պարունակում և ուղարկվում են հայ օգտատերերին»,- հավելեց մարդու իրավունքների պաշտպանը՝ ընդգծելով, որ դրանք կազմակերպված բնույթ են կրում: