«Մի պահ թվաց, թե վերջին վայրկյանն ենք ապրում»․ կին հետախույզը վերադարձել է փոքրիկի կարոտն առնելու

Թշնամու դեմ կռվող կին հետախույզը պատերազմի առաջին օրվանից մարտադաշտում է։

Միայն օրեր առաջ է վերադարձել՝ երեխայի կարոտն առնելու։ Ո՛չ ինքը, ո՛չ պատերազմի այլ ուղղությամբ մարտական գործողություններ իրականացնող ամուսինը ներկա չեն գտնվել երեխայի մեկամյակին։

«Առաջին հերթին մեր երեխաների համար ենք ամեն ինչ անում, որ վաղը նրանք պատերազմ չտեսնեն, ինչպես մենք»,-ասում է կին մարտիկը։

Հետախուզական խմբի փոխհրամանատարը գործողությունների մասին հասկանալի պատճառներով լռում է և բարձրաձայնում է միայն մարտադաշտում ունեցած ապրումների մասին։

«Մեզ թվում էր, որ արդեն հետ չենք գա։ Երբ Ջաբրայիլում էինք, մի պահ ամեն Գրադի խփելուց թվում էր, թե վերջին վայրկյանն էինք ապրում»,- խոստովանում է նա։

Հերոսուհին կրկին վերադառնալու է առաջնագիծ։ Ամուսինը վիրավոր է։ Կազդուրվելուց հետո նա նույնպես պատրաստվում է մեկնել հայրենիքի պաշտպանության սրբազան գործն ավարտին հասցնելու։