«Չափերդ ճանաչի՛ր». Բաբաջանյանն ու Բալայանը վիճեցին

«Ունենք կաթվածահար եղած կառավարման համակարգ ու չենք կարող բնականոն ռեժիմով ակնկալել արդյունավետ լուծումներ, որոնք իսկապես օրհասական են ու գերկարևոր այս պահին»,- ԱԺ-ում հայտարարեց պատգամավոր Արման Բաբաջանյանը: Անդրադառնալով վարչապետի՝ նախօրեին հրապարակած ճանապարհային քարտեզի 8-րդ կետին՝ ասաց, «Պաշտպանական գերատեսչությունը, որն ամենամեծ մեղսակցությունն ունի տեղի ունեցածի մեջ, այս կազմով չի կարող ձեռնամուխ լինել այդ աշխատանքին ու մենք՝ որպես ԱԺ, պետք է հետամուտ լինենք տեղի ունեցածին: Պաշտպանական գերատեսչությունը, արտաքին քաղաքական գերատեսչությունը, անվտանգության խորհուրդը և պատասխանատու այլ մարմիններ պետք է ժամ առաջ այդ խիզախությունն ունենան, լքեն այդ պաշտոններն ու թույլ տան, որպեսզի նոր, առողջ, պրոֆեսիոնալ մարդիկ նվիրվեն աշխատանքին: Չեն կարող կլանային, կոռուպցիոն, մաֆիոզ կապերով կաշկանդված պետական կարևորագույն պաշտոններ զբաղեցնող մարդիկ զբաղվեն այս կարևոր աշխատանքներով»,- հավելեց Բաբաջանյանը:

Արձագանքելով՝ ՊՆ փոխնախարար Գաբրիել Բալայանը կոռեկտության կոչ արեց պատգամավորին: «Կխնդրեմ, որպեսզի մնաք էթիկայի կանոնների շրջանակներում և մեղադրանքներ հնչեցնելուց հստակ լինեք։ Եթե իրավաբանական այդքան գիտելիք չունեք, ես ձեզ խոստանում եմ օժանդակել, որ հանցագործության մասին հաղորդում ներկայացնեք իրավապահ մարմինների՝ կոնկրետ անձանց մեղադրանքներ ներկայացնելով՝ մաֆիոզ, կլանային և այլն»:

«Չափերդ ճանաչի՛ր»,- նրան հորդորեց Բաբաջանյանը։

«Իմ չափերը ճանաչելու վերաբերյալ, կարծում եմ, պետք չէ խոսել, դուք ձեր չափը ճանաչեք...»,- արձագանքեց փոխնախարարը: