Ուրբաթ, 20 նոյեմբերի, 2026 թ.
|
Ստեփանակերտում`   +7 °C

««Մեկ բաժակ ջրում փոթորիկ առաջացնելու» խնդիրը». Գոռ Աբրահամյանը պարզաբանում է

««Մեկ բաժակ ջրում փոթորիկ առաջացնելու» խնդիրը». Գոռ Աբրահամյանը պարզաբանում է
382
Ուրբաթ, 11 դեկտեմբերի, 2020 թ., 16:50

ՀՀ գլխավոր դատախազի խորհրդական Գոռ Աբրահամյանը ֆեյսբուքյան իր էջում գրել է. «Այս օրերին, ցավոք, շատ բնորոշ է դարձել հանրային պրկված նյարդերի լարերի վրա խաղալով՝ մանր սենսացիաների պատրանք ստեղծելու համար «մեկ բաժակ ջրում փոթորիկ առաջացնելը»: Հերթականը կոնկրետ լրատվամիջոցին հղմամբ՝ այսօր այլ լրատվամիջոցներով ևս տարածված այն լուրն էր, թե իբր, պատերազմի օրերին դատախազությունը «ոչինչ չի խնայել»: ՀՀ գլխավոր դատախազի՝ ապօրինի ծագում ունեցող գույքի բռնագանձմանն ուղղված գործառույթների ոլորտը համակարգող տեղակալի համար նոր ծառայողական մեքենա ձեռք բերելու և ապօրինի ծագում ունեցող գույքի բռնագանձման գործերով վարչության համար նախատեսված վարչական տարածքի վերանորոգման համար՝ այդ նպատակով ընդհանուր ծախսելով 60 մլն ՀՀ դրամ: Տեղեկատվությունը հրապարակող մեր գործընկերները «համեստաբար» մոռացել են դրանում նշել, որ նշված աշխատանքների համար պետական բյուջեից գումարները տրամադրվել են պատերազմից շատ ավելի վաղ: Մասնավորապես դրա վերաբերյալ որոշումները ՀՀ կառավարությունն ընդունել է 2020թ. սեպտեմբերի 10-ին իր համապատասխանաբար 15-18Ն և 15-25Ն որոշումներով: Որից հետո բնականոն հունով սկսվել է գնումների, պայմանագրերի կնքման և մնացած ընթացակարգերը:

Իսկ դատախազությունը պատերազմի ընթացքում, իսկապես, «ոչինչ չի խնայել»: Հայկական զինված ուժերին ֆինանսական աջակցություն ցուցաբերելու նպատակով ՀՀ դատախազությունն իր բյուջեից այդ ընթացքում 78,5 միլիոն դրամ է փոխանցել «Հայաստան» համահայկական հիմնադրամին։

«Մեկ բաժակ ջրում փոթորիկ առաջացնելու» խնդիրը, հավանաբար, թույլ չի տվել հրապարակվածի մեջ նաև այս մասին հիշատակել»: