«Մեր երեխաները պետք է ծառայեն ՀՀ ԶՈՒ-ում, ուրիշ ո՛չ մի տեղ». բողոքի ակցիա

«Իմ երեխեն կռվելա, վիրավորվել ա, հիմա էստեղ ա, բայց կիսաբուժված, նորից ուզում են տանեն Ղարաբաղ»,- բողոքում են ՀՀ կենտրոնական հավաքակայանի մոտ բողոքի ակցիա իրականացնող արձակուրդ եկած ժամկետային զինծառայողների ծնողները՝ նշելով, որ թույլ չեն տալիս իրենց որդիներին նորից Արցախ տանել:

«Մենք ընդհանրապես դեմ ենք, որ մեր երեխեքին տանեն Ղարաբաղ, մեր էրեխեքը թող Հայաստանում ծառայեն: Մեր պահանջը դա է՝ թող մնան Հայաստանում՝ հա՛մ կծառայեն, հա՛մ կբուժվեն, հատկապես, որ հոգեբանների կարիք ունեն»,- ասացին ծնողները՝ տեղեկացնելով, որ արձակուրդ վերադարձած երեխաների հոգեկան առողջությունը խաթարված է. «Երեխաս վախեցած է, չի կարողանում գիշերը քնել, ատամները կրճտացնում ա, խոսում ա քնած ժամանակ, թոքերում էլ խնդիր ունի, նրան բուժում է պետք»,- ասաց ծնողներից մեկը:

Մյուսն էլ հավելեց, թե «փափուկ բարձ» են դնում իրենց գլխի տակ, ասում են՝ իբր պիտի երեխաներին մարզերում ցրեն, հետո նոր որոշեն՝ ուր տանեն:

«ՊՆ-ից ասում են, թե Արցախը հայ զինվորների կարիքն ունի, բայց եթե Արցախը մեր երեխաների կարիքն ունի ու էսօր նրանք հոգեբանորեն պատրաստ չեն, հիվանդ են, չեն կարող գնալ, բա չմտածե՞ն նրանց առողջության մասին»: