«Զինվորական համազգեստով մեկն ասել է՝ «դուք Եռաբլուր գալու իրավունք չունեք»»․ Մարգարիտա Խաչատրյան

Եռաբլուր պանթեոնում են գտնվում նաև սևազգեստ մայրերը։ Քիչ առաջ «Զինվորի մայր» ՀԿ նախագահ Մարգարիտա Խաչատրյանը լրագրողների հետ զրույցում ասաց, որ զինվորական համազգեստով մեկը մոտեցել է Շուշիում զոհված զինծառայողի մորը և ասել, որ նրանք իրավունք չունեն Փաշինյանին թույլ չտալու Եռաբլուր մտնել։
«Ասում ա՝ դուք էս ի՞նչ եք անում, իրավունք չունեք երթը չթողնելու, ասում ա՝ դուք Եռաբլուր գալու իրավունք չունեք․․․»,- նշեց նա։
Մարգարիտա Խաչատրյանի կողքին էր գտնվում Արցախյան առաջին պատերազմում զոհված զինծառայողի մայրը, ում, նրանց պատմելով մոտեցել էր զինվորական համազգեստով տղամարդը․ «Էկել եմ հատուկ անպատվելու Նիկոլին»,- ասաց կինը։
Դիտարկմանը, թե միգուցե զինվորական համազգեստով տղամարդը եղել է ռազմական ոստիկանության աշխատակից, Մարգարիտա Խաչատրյանը հերքեց՝ նշելով, որ ռազմական ոստիկանության աշխատակիցները հեռացրին տղամարդուն։