Ավագանու «Իմ քայլը» խմբակցության մի շարք անդամներ հրաժարական են տվել

«Իմ քայլը» կուսակցությունների դաշինքի Երևան քաղաքի ընտրական ցուցակով ընտրված Երևան քաղաքի ավագանու անդամներ Հայկ Սիրունյանը և Մեսրոպ Պապիկյանը դիմումներ են ներկայացրել ավագանու անդամի լիազորությունները դադարեցնելու մասին: Այս մասին այսօր Երևանի ավագանու նիստի մեկնարկին հայտարարեց փոխքաղաքապետ Հրաչյա Սարգսյանը:

Սարգսյանը նշեց, որ Երևանի ավագանու «Իմ քայլը» կուսակցությունների դաշինքի ընտրական ցուցակով ընտրված և լիազորությունները վաղաժամկետ դադարեցրած անդամներ Արսեն Կարապետյանի, Հայկ Սիրունյանի և Մեսրոպ Պապիկյանի մանդատները տրվել են «Իմ քայլը» կուսակցությունների դաշինքի ընտրական ցուցակի հերթական հաջորդ թեկնածուներ Սերգեյ Գյոզալյանին, Վահե Օհանջանյանին, Կարինե Փանոսյանին: Վերջինս դիմում է ներկայացրել ավագանու անդամի լիազորությունները դադարեցնելու մասին: Փանոսյանի մանդատը տրվել է Գևորգ Աճեմյանին: «Իմ քայլը» խմբակցության անդամներ Էռնես Ավանեսովը, Սերգեյ Գյոզալյանը խմբակցության կազմից դուրս գալու մասին դիմումներ են ներկայացրել: Նրանք շարունակում են ավագանում անդամի իրենց լիազորությունները: