«Մանվել Փարամազյանին մեղադրանք առաջադրվեց». Երվանդ Վարոսյան

Քաջարանի քաղաքապետ Մանվել Փարամազյանը փաստաբան Երվանդ Վարոսյանի հետ քիչ առաջ դուրս եկավ Քննչական կոմիտեից:

«8 ամիս առաջ Քաջարանում դեպքեր տեղի ունեցան՝ կապված երեք քաղաքացիների ձերբակալության հետ: Այսօր Մանվել Փարամազյանին մեղադրանք առաջադրվեց՝ իբր այդ անձանց հետ խմբով ինչ-որ մեկին առևանգելու հետ կապված»,- այս մասին լրագրողների հետ զրույցում հայտարարեց փաստաբան Երվանդ Վարոսյանը:

«Կարող եմ ասել, որ ոտքից գլուխ անհեթեթություն է: Նախ այդ տղաները, ում ձերբակալել էին, վաղուց ազատության մեջ են: Մամուլից ստացած տեղեկություններով՝ այն անձը, ով այդ գործով որպես տուժող էր ներկայացվում, վաղուց արդեն ներկայացրել է իրականությունը: Այն, որ Քաջարանի քաղաքապետը դրա հետ առնչություն չունի, դա փաստ է:

Վարոսյանի համոզմաբ՝ իրականացվում է քաղաքական հետապնդում:

«Նախաքննական մարմինը որոշում է կայացրել կալանավորումը որպես խափանման միջոց ընտրելու միջնորդություն ներկայացնել դատարան: Երբ կներկայացվի, երբ կնշանակվի համապատասխան դատական նիստ, դեռ տեղեկություն չունենք»,- հավելեց փաստաբանը:

Հիշեցնենք, որ Քաջարանի քաղաքապետն այսօր հրավիրվել էր Քննչական կոմիտե: Նա հայտարարել էր, որ իր հանդեպ իրականացվում է քաղաքական վրեժխնդրություն: Ավելի վաղ Փարամազյանը պահանջել էր վարչապետ Փաշինյանի հրաժարականը: