«Աշխատակիցը հարցրեց՝ ի՞նչ եք անելու այս գումարով․ կարծեմ Արարատբանկն էր». Նարինե Կռոյան

Դասախոս, արձակագիր Նարինե Կռոյանը ֆեյսբուքյան իր էջում գրել է. «Երկու անհասկանալի փաստ, որոնք իմ բանականությունը հրաժարվում է ընկալել:
Ի՞նչ է սա
1. Դրամական փոխանցում էի ստանում, կարծեմ, Արարատ բանկն էր: Երկար չսպասեցրին: Սակայն.... աշխատակիցն անսպասելի հարցրեց.
- Ի՞նչ եք անելու այս գումարով...
Մի պահ չհասկացա, շփոթվեցի.
- Ինչո՞ւ եք հարցնում, ի՞նչ իրավունքով....
- Կենտրոնաան բանկն է պահանջում, մենք մեղք չունենք:
- Այսինքն՝ Կենտրոնական բանկը «Անձնական տվյալների պաշտպանության մասինՀՀ օրենքն» է խախտում՝ դուք էլ նրա հետ միասին:
- Մենք մեղք չունենք, կներեք...
- Լավ, գրեք՝ պարան եմ առնելու, որ կախվեմ:
Վարագույր:
2. Հաշվեհամար կար ձեռքիս՝ թանկարժեք բուժման կարիք ունեցող զինվորի: Առաջին 5 թվանշաններից հասկացա, որ Յունիբանկում է: Գնացի, կտրոն վերցերցի և սպասեցի, սպասեցի, սպասեցի.... Առաջին անգամ էի այդ բանկից օգտվում և աշխատակցին խնդրեցի, որ օգնի՝ փոխանցումս տերմինալով անեմ: Պարզվեց, որ անհրաժեշտ է նաև ստացողի ծննդյան օրը, ամիսը և տարեթիվը (լավ է, որ ժամի պահանջ չկար), ինչը, բնականաբար, ես չգիտեի:
Աշխատակիցն ասաց, որ եթե չգրենք, փոխանցումը չի ընդունի: Մի խոսքով, երկար-բարակ մտածելուց հետո որոշեցինք աշխատակցի տվյալները ներբեռնել: Գումարը գնաց, բայց դա դեռ վերջը չէր:
Տունդարձի ճանապարհին զանգ ստացա: Ասացին՝ Յունիբանկից է, որ սխալ է եղել, որ ստացողի ծննդյան տվյալները իմ գրածին չեն համապատասխանում, և գործարքը կմերժեն:
Չզայրացա. ուժ չունեի, լացս եկավ: Սառը քամու տակ կանգնած լաց եղա, չամաչեցի:
Ասացի՝ խիղճ ունե՞ք, ես էդ տղային չեմ ճանաչում, հո փող չեմ գողանում, տալիս եմ: Իրեն շատ է պետք... խնդրում եմ: Երևի խոսողը հասկացավ: Ասաց՝ լավ ու անջատեց հեռախոսը»: