«Ժամանակ ունե՞ս, զբաղվիր գերիներով»․ Նորայր Նորիկյան

Փաստաբան Նորայր Նորիկյանը ֆեյսբուքյան իր էջում գրել է. «Սովորաբար, որևէ վերլուծական հոդված գրելու համար նվազագույնը մի քանի ժամ է պետք, եթե չասենք մի ամբողջ օր ու գիշեր:
Ժամանակի արդյունավետ օգտագործումը կարող է բարիք ստեղծել, նպաստել էլ ավելի մեծ արդյունք ստանալու համար, վերջապես՝ իմաստավորված լինել:
Հայաստանի պես պետությունների ղեկավարներն այսօր ազատ ժամանակ չպետք է ունենային: Նրանց ժամանակը պետք է «սպառվեր» բացառապես պետության խնդիրները լուծելու համար:
Ժամանակի վատնումը հնարավոր է մի դեպքում, երբ չգիտես ինչ անես, երբ մատնվել ես հարկադիր պարապուրդի, երբ չես հասկանում քո գործից և ժամանակ ես մեռցնում՝ մինչև աշխատանքային օրվա ավարտը:
Այս իրավիճակում մսխել ժամանակը՝ ապացուցելու համար, որ Արցախի հակամարտության պատմությունն անհաջողությունների շղթա է և փորձել «արդարացնել» աղետը, ազնիվ չէ:
Վազգեն Սարգսյանն իր «Քարի մեջ արյուն կա՛» պատմվածքում գրում էր. «Մենք՝ մենք ենք, խոսեք, տեսնենք՝ դու՞ք ովքեր եք»:
Հայ ժողովուրդը շատ լավ գիտի, թե որ իշխանությունն ի՞նչ է արել: Դու խոսիր քո՛ գործերից, ցույց տուր քո՛ արածները, ցույց տու՛ր գեթ մեկ ոլորտ, որտեղ տապալում չկա, որտեղ հայեցակարգային լուծում է տրվել որևէ համակարգային խնդրի:
Դու գործո՛վ ապացուցեիր, որ նախորդ բոլոր քաղաքական վարչակարգերը սխալ էին, անհաջողակ էին, իսկ դու՝ ՄԻԱԿ բացառիկը, հաջողակը, անսխալականը, հերոսը, Քրիստոսը...
Ժամանակ ունե՞ս, զբաղվիր գերիներով, դելիմիտացիայով, դեմարկացիայով, անտուն մնացած հազարավոր մարդկանց խնդիրները լուծելով, երկրի ներսում ատելության մթնոլորտի վերացմամբ, բանակի ու Հայաստանի խաթարված միջազգային վարկի վերականգնմամբ, աշխարհաքաղաքական կենտրոնների հետ արժանապատիվ հարաբերությունների հաստատմամբ, պետական կառավարման համակարգի արդյունավետության բարձրացմամբ:
Գիտե՛մ, ժամանակ չունես, հաջորդ հոդվածն ես գրում»: