«Այո՛, համեմատական են թե՛ մեդիալ պատկերը, թե՛ երկրի ղեկավարի կողմից պոպուլիզմի և անպատասխանատվության դրսևորումները»․ Զառա Հովհաննիսյան

Իրավապաշտպան, հրապարակախոս Զառա Հովհաննիսյանը ֆեյսբուքյան իր էջում գրել է. «Շատ փոքր է մեր երկիրը և աշխարհաքաղաքական խաղացողների շարքում որպես գործոն հանդես չի գալիս, որպեսզի համեմատականներ դրվեն ԱՄՆ-ի և Հայաստանի միջև, սակայն բազմաթիվ վերլուծաբաններ նույնիսկ Թվիթերում հրապարակել են երկու ամիս առաջ Հայաստանի խորհրդարանում և այսօր՝ ԱՄՆ կոնգրեսում կատարվող իրադարձությունների լուսանկարներ՝ ասելով, որ իրավիճակը համեմատական է։
Իրականում, այո՛, համեմատական են թե՛ զուտ մեդիալ պատկերը, թե՛ երկրի ղեկավարի կողմից պոպուլիզմի և անպատասխանատվության դրսևորումները։ Ցավոք, երկու դեպքում էլ ժողովրդավարությունը վերածվել է ժողովրդին սադրելու և հրահրելու գործիքի։
Սա նաև բարենպաստ իրավիճակ է ստեղծում ավտորիտար ռեժիմների համար, որոնք ուղղակի ցնծության մեջ են։ Նրանք արագորեն օգտվում են նման առիթներից՝ հնարավորություն ստանալով լուծել իրենց խնդիրները ուժային ճանապարհով։
Հայաստանի և Արցախի շուրջ տեղի ունեցածը հենց ասվածի վառ դրսևորումն է, և, միգուցե, նույնիսկ սպասվող մեծ իրադարձությունների փոքրամասշտաբ փորձարկումը»։