«Դուք շարունակում եք զբաղվել դատական բարեփոխումների կարկատաններով». Սամսոնյանը՝ Բադասյանին

Այսօր՝ ԱԺ արտահերթ նիստի ժամանակ, ԼՀԿ պատգամավոր Անի Սամսոնյանը, դիմելով արդարադատության նախարար Ռուստամ Բադասյանին, ասաց. «Պարո՛ն Բադասյան, անցած տարի քննարկել ենք դատական օրենսգրքի բարեփոխումների մի մեծ փաթեթ: Հազար անգամ քննարկել ենք, թե ինչպես իրականացնել այդ բարեփոխումները: Դուք շարունակում եք զբաղվել դատական բարեփոխումների կարկատաններով…։ Ուզում եմ հասկանալ՝ երկա՞ր ենք շարունակելու արտահերթ նիստեր գումարելով կամ հերթական նստաշրջաններում հատվածական փոփոխություններ բերելով՝ մեր օրակարգը լցնել այդպիսի կարկատաններով»:

Նախարարը Սամսոնյանի գնահատականների հետ չհամաձայնեց․ «Կա դատական իրավական բարեփոխումների ռազմավարություն, կա գործողությունների ծրագիր: Մեր բոլոր գործողությունները բխում են այդ ռազմավարության տրամաբանությունից և նշված գործողությունների ծրագրից»,- ասաց Բադասյանը:

Հիշեցնենք, որ այսօրվա արտահերթ նիստի օրակարգում Ռուստամ Բադասյանը ներկայացրեց կառավարության կողմից առաջարկված «ՀՀ դատական օրենսգիրք» սահմանադրական օրենքում փոփոխություններ և լրացումներ կատարելու մասին օրենքի և հարակից օրենքների նախագծերի փաթեթը, որի ընդունման հրատապությունը, ըստ նախարարի, պայմանավորված է դատավորների թվաքանակի ավելացման և դրանով քրեական մասնագիտացման դատավորների ծանրաբեռնվածությունը թեթևացնելու, ինչպես նաև մինչդատական քրեական վարույթի գործերի քննության արդյունավետությունը բարձրացնելու անհրաժեշտությամբ: