«Այսպիսի բան չէր կարող լինել իրեն և իր քաղաքացիներին հարգող պետությունում». Կարեն Հեքիմյան

«Քաղաքացու իրավունքների պաշտպան» ՀԿ նախագահ Կարեն Հեքիմյանը ֆեյսբուքյան իր էջում գրել է. «Այսօր, Երևանի ժամանակով 20:21-ին Գյումրիի «Շիրակ» միջազգային օդանավակայանում վայրէջք կատարեց Մոսկվա-Երևան չվերթն իրականացնող Pobeda DP 855 ավիաընկերության ինքնաթիռը: Ավիաընկերությունը, բացի ուղևորներին Գյումրի հասցնելուց, պարտավորվել է լուծել նաև Երևան գնացողների տրանսպորտով փոխադրման խնդիրը: Արդեն «Շիրակ» օդանավակայանում, Երևան գնացող ուղևորները պարզել են, որ իրենց տեղափոխող որևէ փոխադրամիջոց չկա, հետևաբար ավիաընկերությունը պարտավորությունը չի կատարել ( այլ կերպ՝ քցել է ): Դե ուղևորներն էլ ով ոնց կարող է Երևան է գալիս: Անշուշտ սա խայտառակություն է: Այսպիսի բան չէր կարող լինել իրեն և իր քաղաքացիներին հարգող պետությունում: Սակայն մենք ապրում ենք Հայաստանում, որտեղ «Pobeda» ավիաընկերության ղեկավարի տեղակալի վարորդը ավիացիայի ոլորտի հայաստանյան պաշտոնյաներից ավելի ծանրակշիռ դեր ունի: Այդ իսկ պատճառով, ես խնդրի լուծման ակնկալիքով չեմ դիմում մեր երկրի որևէ պաշտոնյային: Ես, ամոթս կորցրած, հաղթահարելով բարոյականության սկզբունքներս, ստիպված դիմում եմ Ռուստամ Մուրադովին և Սերգեյ Կոպիրկինին, վերջիններիս առաջարկելով միջոցներ ձեռնարկել «Pobeda» ավիաընկերությանը՝ պատշաճ և իրավաչափ վարքագիծ դրսևորելու պարտավորեցման համար»: