«Դրական, լուրջ պատասխան չստացանք նախարարից»․ անհետ կորած զինվորի հարազատ

Անհետ կորած զինծառայողների մի քանի ծնողներ այսօր հանդիպեցին ՀՀ Պաշտպանության նախարար Վաղարշակ Հարությունյանի հետ։ Ծնողներից մեկը հայտնեց, որ թեպետ նրանք պահանջել էին, որ Օնիկ Գասպարյանը նույնպես ներկա լինի հանդիպմանը, բայց նա չէր եկել:

«Նախարարի հետ երկար զրույց ունեցանք։ Հարցերը լրիվ տվեցինք։ Նաև մեր դժգոհությունը հայտնեցինք, որ ընդունել են միայն 5 ծնողի, դա հարց չի լուծում։ Առաջնահերթ խոսակցության խնդիրը եղավ գերիների հետ կապված, երկրորդը՝ թե ինչ գործողություններ են կատարվում։ Նախարարը հայտնեց, որ գերիների հետ կապված տարբեր պետությունների դեսպանների հետ ա հանդիպում ունենում, որ ճնշումներ գործադրվի։ Ասաց, որ անհետ կորածների մասով հիմա ամեն կերպ լայնամասշտաբ գործողություններ են արվում, որ տեսնենք՝ դրա լուծումը ոնց ենք տալիս։ Կարճ ասած՝ դրական լուծման հարց չեղավ, այսինքն մենք նախարարից դրական, լուրջ ու անհապաղ պատասխան չստացանք»,- լրագրողների հետ զրույցում ասաց անհետ կորած զինվորներից մեկի հարազատը։