«Վարդենիս-Մարտակերտ ճանապարհը միակողմանիորեն ծառայում է Ադրբեջանին»․ Թագուհի Թովմասյան

«Նոյեմբերի 9-ի չարաբաստիկ հայտարարության 9-րդ կետում ասվում է, որ տարածաշրջանում տնտեսական և տրանսպորտային բոլոր կապերը ապաշրջափակվում են։ Եթե ապաշրջափակման մասին ենք խոսում, ուրեմն նշանակում է, որ Վարդենիս-Մարտակերտ ճանապարհը նույնպես պետք է ապաշրջափակվի և գործի»,- այսօր՝ ԱԺ-ում հայտարարությունների ժամին ասաց պատգամավոր Թագուհի Թովմասյանը։

Նա նշեց, որ այդ հարցով ինքն արդեն դիմել է ԱԳ նախարարին և փոխվարչապետին ու հետևողական է լինելու, որ այն օր առաջ դառնա քննարկման թեմա:

«Պետք է արձանագրել, որ համահայկական ջանքերով կառուցված ճանապարհն, ըստ էության, հիմա միակողմանիորեն ծառայում է ապաշրջափակման խոստում տված Ադրբեջանին, իհարկե՝ ռուսական կողմի ուղեկցությամբ։ Մեզ էլ ոչինչ չի խանգարում, որ կարողանանք հասնել այս ճանապարհի վերագործարկմանը՝ դարձյալ ռուս խաղաղապահների ուղեկցությամբ»,- հայտարարեց Թովմասյանը։