«Մոբ ռեսուրսների որոշ վճարումներ ուշացել են. ո՞րն է պատճառը». պատգամավորը՝ պաշտպանության նախարարին

Այսօր՝ Կառավարություն-ԱԺ հարցուպատասխանի ժամանակ, «Իմ քայլը» խմբակցության պատգամավոր Վիկտոր Ենգիբարյանը ՊՆ Վաղարշակ Հարութունյանին հարց ուղղեց՝ նշելով, որ մոբ ռեսուրսների վճարումների հետ կապված որոշ ուշացումներ կան: Պատգամավորի հարցին, թե ինչով է պայմանավորված, նախարարը պատասխանեց.

«Այս պահին չի վճարվել մոբ ռեսուրսների երեքից չորս տոկոսը: Նրանք են, ովքեր չեն ներկայացրել անձնական տվյալները և նրանք, ովքեր դուրս են եկել զինկոմիսարիատի հանձնարարությամբ և զորամաս չեն հասել: Բնական է, որ այստեղ հաշվառման հարց է առաջանում»,- ասաց նախարարը՝ նշելով, որ իրականացվում է հաշվառում:

Նախարարի խոսքով՝ չեն վճարվել նաև նրանք, ովքեր կամավորության սկզբունքով են գնացել, սակայն զորամասում նախապես չեն գրանցվել:

«Վճարվելու համար պահանջում ենք, որ ներկայացնեն տվյալներ զորամասից, որտեղ եղել են»,- նշեց նախարարը: