«Սյունիքում աշխատելու մասով ԱԱԾ-ի պահանջը չունի որևէ իրավական հիմք». Դ. Իոաննիսյան
250
Չորեքշաբթի, 10 փետրվարի, 2021 թ., 21:55
«Իրազեկ քաղաքացիների միավորում» ՀԿ հիմնադիր, ծրագրերի համակարգող Դանիել Իոաննիսյանը ֆեյսբուքյան իր էջում գրել է. «Հարգելի լրագրողներ, Սյունիքում աշխատելու մասով ԱԱԾ-ի պահանջը չունի որևէ իրավական հիմք. ԱԱԾ Սահմանապահ զորքերն այսօր հայտարարել են, որ Սյունիքի մարզի սահմանամերձ գյուղերում աշխատելու համար լրագրողներին «անհրաժեշտ է ունենալ ՀՀ ազգային անվտանգության մարմինների համաձայնությունը»: ՀՀ Սահմանադրության 42-րդ և 51-րդ հոդվածները երաշխավորում են կարծիք արտահայտելու ազատությունն ու տեղեկատվություն ստանալու իրավունքը: Այդ իրավունքները կարող են սահմանափակվել միմիայն օրենքով՝ սահմանադրությամբ թվարկված նպատակների համար: Որևէ օրենքով նախատեսված չէ, որ սահմանամերձ համայնքներում լրագրողների աշխատանքի համար պետք է ԱԱԾ-ից թույլտվություն ստանալ: Նման բան կարող էր սահմանված լինել ռազմական դրություն հայտարարելու մասին որոշմամբ, բայց համապատասխան կետը (Ազգային Ժողովի որոշմամբ) դեկտեմբերի 2-ին ուժը կորցրել է: Միաժամանակ, բացի մայր օրենքից, «Զանգվածային լրատվության մասին» օրենքի 4-րդ հոդվածի 3-րդ մասը հստակ արգելում է՝ 1) գրաքննությունը. 2) որևէ տեղեկատվություն տարածելուն կամ դա տարածելուց հրաժարվելուն նպատակաուղղված կամ դրան հանգեցնող հարկադրանքը լրատվական գործունեություն իրականացնողի և լրագրողի նկատմամբ. 3) լրագրողի մասնագիտական օրինական գործունեությանը խոչընդոտելը... Այսինքն՝ Սյունիքի մարզի սահմանամերձ գյուղերում լրագրողների կողմից նյութեր պատրաստելն օրինական է և ԱԱԾ-ի կողմից չի կարող արգելվել կամ խոչընդոտվել: Հիշեցնում եմ նաև, որ քրեական օրենսգրքի 164-րդ հոդվածը ևս մեկ անգամ արգելում է լրագրողի մասնագիտական օրինական գործունեության խոչընդոտումը ու պատասխանատվություն սահմանում դրա համար: Հետևապես, եթե որևէ մեկը (այդ թվում՝ սահմանապահ զորքերից) ապօրինի խոչընդոտի լրագրողների աշխատանքը, ապա դա կպարունակի Քրեական օրենսգրքի 164-րդ հոդվածով արգելված արարքի հատկանիշներ: Եթե պետական անվտանգության նպատակով առաջացել է որոշ տարածքներում լրագրողների գործունեության սահմանափակման օբեկտիվ անհրաժեշտություն, ապա ռազմական դրության ժամանակ դա կարող է անել կառավարությունը՝ հստակ սահմանելով իրավունքի սահմանափակման ծավալներն ու հարակից կարգերը: Հ.Գ. ԱԱԾ-ին հորդորում եմ իր վրա չվերցնել այն գործառույթները, որոնք Սահմանադրությամբ վերապահված են օրենսդիր մարմնին»:
