Բաքուն Ռուսաստանին պարզաբանումներ է տվել Արցախում հուշարձանների պղծման վերաբերյալ

Ադրբեջանը Ռուսաստանին պարզաբանումներ է տվել՝ Լեռնային Ղարաբաղի Ասկերանի շրջանի Ավետարանոց գյուղում Հայրենական մեծ պատերազմում զոհվածների հիշատակին նվիրված հուշարձանի պղծման փաստի վերաբերյալ: Բաքվում հավաստիացրել են, որ հետաքննություն է ընթանում և մեղավորները պատասխանատվության կենթարկվեն, ճեպազրույցի ժամանակ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան:
«Մեր սկզբունքային դիրքորոշումը հուշարձանների պղծման վերաբերյալ՝ հայտնի է. հուշարձանների ցանկացած պղծում անթույլատրելի է, իսկ երբ խոսքը վերաբերում է Հայրենական Մեծ պատերազմի հերոսների հիշատակին նվիրված հուշարձաններին, ապա այս պարագայում, սկզբունքորեն այլ դիրքորոշում լինել չի կարող։
Համապատասխան տեղեկատվություն ստանալուն պես, կապվեցինք մեր ադրբեջանցի գործընկերների հետ, և նրանք հավաստիացրեցին, որ վանդալիզմի, Հայրենական մեծ պատերազմի ժամանակ զոհված զինվորների հիշատակին նվիրված հուշարձանների և գերեզմանատների պղծման ակտերը ժամանակին արձանագրվել են ադրբեջանական կողմից»,- ասել է Զախարովան:
Բաքվում հավաստիացրել են, որ հետաքննություն է իրականացվում այդ գործողությունների բացահայտման ուղղությամբ, և նրանք, ովքեր վանդալիզմի ակտեր են իրականացնում, ենթարկվում են պատասխանատվության, նման գործողությունները կտրականապես կասեցվում են և բացարձակապես չեն խրախուսվում:
Զախարովան հիշեցրել է՝ Մոսկվայում, Բաքվում և Երևանում պետք է հիշեն, որ Հայրենական մեծ պատերազմում տարած հաղթանակը մեր ժողովուրդների ընդհանուր ձեռքբերումն է և նման գործողություններին պետք է արձագանքեն բոլորը միասին:

Ավելի վաղ հայտնել ենք, որ ադրբեջանցիները պղծել են Հայրենական մեծ պատերազմի զոհերի հիշատակին նվիրված հուշարձանը, որը գտնվում է Արցախի Ավետարանոց գյուղում: