Թամանյան 2 շենքի բնակիչների բաց նամակը՝ Երևանի քաղաքապետ Հայկ Մարությանին

343

Կիրակի, 07 մարտի, 2021 թ., 10:30

Երևանի Թամանյան փողոցի 2-րդ շենքի մի խումբ բնակիչներ Երևանի քաղաքապետ Հայկ Մարությանին հայտնում են, որ ապօրինի շինարարության թույլտվության հետևանքով կառուցապատողների կողմից փոփոխության է ենթարկվել Թամանյան 2 բնակելի շենքի միջհարկային ծածկը և շինարարության թույլտվությունն անվավեր ճանաչելու մասին Երևանի քաղաքապետի որոշումը չի կատարվել։

«Ինչ–որ անձանց կամայականությունների ու բիզնես շահերի բավարարման, Երևանի քաղաքապետարանի պաշտոնատար անձանց անգործության հետևանքով ստորադասվում և ոտնահարվում են մեր՝ բարեխիղճ քաղաքացիներիս իրավունքները։ Մեզ մոտ առկա է մտահոգություն, որ հ. 35 բնակարանի և հ. 67 տարածքի

գործառնական նշանակության փոփոխման հետևանքով այն կօգտագործվի որպես հանրային սննդի և/կամ զվարճանքի հերթական օբյեկտ, ինչի մասին տարածքի

սեփականատերերը մի քանի անգամ բարձրաձայնել են մասնավոր զրույցներում։ Մի շարք հանգամանքներից ելնելով մենք դեմ ենք նշված հասցեում նոր հանրային սննդի և/կամ զվարճանքի օբյեկտի կառուցմանը: Մասնավորապես՝ խոսքը գնում է «Թեմուրնոց» անունը կրող ռեստորանի ընդլայնման գործընթացի մասին»,- ասվում է բաց նամակում:

Բնակիչները քաղաքապետից ակնկալում են վերոնշյալ

խնդրի արագ և արդյունավետ կարգավորում։