«ՍԴ որոշման մեջ նշված է, որ ԳՇ պետին նշանակում է ՀՀ նախագահը, իսկ ազատման մասին խոսք չկա». Գ. Մանուկյան

«Մեր գործողությունները երբեք պայմանավորված չեն եղել ո՛չ Արմեն Սարգսյանի դիրքորոշմամբ, ո՛չ ԳՇ-ի հայտնի հայտարարությամբ և դրան հաջորդած հայտարարություններով»,- Բաղրամյան պողոտայում՝ պատասխանելով լրագրողի հարցին, թե նախագահի գրասենյակի հայտարարությունը կարո՞ղ է «Հայրենիքի փրկության շարժման» գործողություններում պլաններ փոխել, ասաց ՀՅԴ գործիչ Գեղամ Մանուկյանը:

«Նոյեմբերի 11-ին Ազատության հրապարակում մենք քաղաքացիներին կոչ ենք արել հավաքվել «Նիկոլ, հեռացիր» կարգախոսով, և մեր գործողությունների ծրագիրը շարունակություն է ունեցել մինչև հիմա»,- ասաց նա:

Անդրադառնալով Կառավարության այսօրվա հայտարարությանը, Գեղամ Մանուկյանը նշեց, որ դեռ հայտնի չէ՝ այդ հայտարարությունը Օնիկ Գասպարյանին փոխանցվե՞լ է գրավոր տեսքով, թե՞ ոչ: «Կա վիճելի հարց՝ նախագահը հայտարարել է, որ դիմել է ՍԴ՝ մի օրենքի սահմանադրականությունը ճշտելու հարցում, որի վրա հղում անելով՝ Կառավարությունն ասում է, որ իրավունքի ուժով Օնիկ Գասպարյանը ԳՇ պետ չէ. բայց կա իրավաբանական մեկ այլ հիմնավորում: Բոլոր սահմանադրագետները շեշտում են, որ գլխավոր շտաբի պետի պաշտոնազրկումը չի կարող կարգավորվել այն օրենքով, որ ընդունվել է 2017-ին, իսկ 2018-ին էլ՝ վերախմբագրվել է, և ԳՇ պետի պաշտոնավարումը կարգավորվում է ՀՀ սահմանադրությամբ»:

Գեղամ Մանուկյանը կարևորեց մի հանգամանք, նշելով, որ 2020թ. Արմեն Սարգսյանը դիմել է ՍԴ՝ ճշտելու իր գործառույթները, իսկ որոշման մեջ նշված է, որ ԳՇ պետի դեպքում ՀՀ նախագահը նշանակում է Գլխավոր շտաբի պետ, իսկ ազատման մասին խոսք չկա:

«ԳՇ պետը կարող է պաշտոնազրկվել, եթե կորցրել է ՀՀ քաղաքացիություն, մահացել է, քրեական հանցանք է կատարել, սեփական դիմումի համաձայն, կամ այլ աշխատանքի տեղափոխվելու համար: Այս բոլոր չափորոշիչներում Օնիկ Գասպարյանը չի տեղավորվում, նա շարունակում է մնալ ԶՈՒ ԳՇ պետ»,- շեշտեց Մանուկյանը: