«Պետք է ողջունել հանգուցալուծման էս միտումը»․ Հակոբ Բադալյան

Քաղաքական մեկնաբան Հակոբ Բադալյանը ֆեյսբուքյան իր էջում գրել է. «Օնիկ Գասպարյանը փաստացի ընդունել է իր պաշտոնանկությունը, իհարկե հայտնելով, որ գնահատում է հակասահմանադրական և դիմելու է դատարան: Այդուհանդերձ, տեղի ունեցող պարագայում նրա դիրքավորումը ողջունելի է, այսինքն՝ չգնալ իրավիճակի սրացման: Այդ համատեքստում ողջունելի է նաև կոչը զինվորականությանը՝ շարունակել ծառայությունը հայրենիքին ու ժողովրդին: Մեծ հաշվով, մինչ այդ ստեղծված իրավիճակի համատեքստում նահանջի այլ տարբերակ պատկերացնելը կլիներ բարդ, ըստ այդմ՝ պետք է ողջունել հանգուցալուծման էս միտումը: Իհարկե շարունակում է մնալ զինվորականության և քաղաքական ղեկավարության միջև հակասության «նստվածքը»: Բայց կարևոր է այն, որ էդ «նստվածքը» առավելագույնս հեռացվի քաղաքական գործընթացներից: Էդ իմաստով շարունակում եմ կարծել, որ բացթողում է քաղաքական ուժերին ուղղված կոչի բացակայությունը՝ դադարեցնել զինվորականության հանգամանքի քաղաքական խաղարկումը: Ընդհանուր առմամբ՝ ԳՇ իրավիճակի հանգուցալուծման այս միտման հավանականության բարձրացման մասին դիտարկել էի «Իսկանդերի» վերաբերյալ վարչապետ Փաշինյանի հայտնի պարզաբանումից հետո: Այդուհանդերձ, Հայաստանում քաղաքական ճգնաժամը հեռու է հանգուցալուծումից և շարունակում է ունենալ հրատապ քաղաքական լուծումների կարիք»: