Մեսրոպ Առաքելյանի ղեկավարած կառույցը 50 միլիոն դրամի պայմանագիր է կնքել 1 աշխատակից ունեցող ընկերության հետ

281

Կիրակի, 14 մարտի, 2021 թ., 23:40

ՀՀ աշխատանքի և սոցիալական հարցերի նախարարության Սոցիալական ապահովության ծառայությունը մեկ անձից 50 միլիոն 400 հազար դրամի գնում է իրականացրել։

Գնումն իրականացվել է «Կրտսեր Ալեքսանյան և որդիներ» ՍՊԸ-ից, գրում է 168.am-ը։

Այս ընկերությունը Սոցիալական ապահովության ծառայությանը կմատուցի ծրագրային ապահովման սպասարկման ծառայություններ՝ 2021 թվականի հունվարից մինչև 2021 թվականի դեկտեմբերի 25-ը ներառյալ։
Ընկերությունը պայմանագրով պարտավորվել է իրականացնել կենսաթոշակային հաշվառման միասնական տեղեկատվական համակարգի, նրա ենթահամակարգերի՝ երեխաների ծննդյան միանվագ նպաստ, Մայրության նպաստ, խնամքի նպաստ, աշխատանքային գրքույկներ, Արցախի աշխատանքի, սոցիալական հարցերի և վերաբնակեցման նախարարության կենսաթոշակառուների հաշվառման միասնական համակարգի և Արցախի պաշտպանության բանակի հետագա արտադրական շահագործումն ու լրամշակումը. Այսինքն՝ ստեղծվելու է մեկ միասնական հարթակ։

«Փորձեցինք պարզել, թե քանի՞ աշխատակից ունեցող ընկերության հետ է Մեսրոպ Առաքելյանի ղեկավարած նախարարության ստորաբաժանումը՝ Սոցիալական ապահովության սպասարկման ծառայությունը, կնքել 50 միլիոն դրամ արժեցող պայմանագիր։

Պարզվեց, որ այս ընկերությունից «Զինծառայողների ապահովագրության» հիմնադրամին որպես պարտադիր վճար յուրաքանչյուր ամիս վճարվել է ընդամենը 1000 դրամ՝ այսինքն՝ մեկ աշխատակցի համար, և այդ մեկ աշխատակիցն էլ տնօրեն Գագիկ Ալեքսանյանն է»,- գրում է աղբյուրը։