«Պատերազմի ժամանակ խորը թիկունքի ճանապարհներին ավելի շատ մարդ զոհվել է գիշերային ճակատ-ճակատ վթարներից». Դ. Իոաննիսյան

«Իրազեկ քաղաքացիների միավորում» ՀԿ հիմնադիր, Հանրային խորհրդի անդամ Դանիել Իոաննիսյանը ֆեյսբուքյան իր էջում գրել է. «Մենք երբեմն այնքան անգրագետ ենք, որ մտածում ենք, որ աշխարհից խելոք ենք... Եվ դա կյանքեր է խլում:
Երեկ Դավիթ Բեկի փողոցում մի մեքենայի ուղևոր իրեն դուրս է գցել մեքենայից, երբ իմացել է, որ մեքենան բախման է գնում: Բնականաբար, տեղում մահացել է, բայց եթե մնար մեքենայում ու ամրակապված լիներ, հավանաբար, իր ոտքով տուն կգնար:
Գիտությունն ու մարդկությունը ստեղծել են ամրագոտիներ, հասկացել են, որ ապրելու հավանականության տեսանկյունից կարևոր է, որ մարդ դուրս չընկնի մեքենայից և վթարի պահին ֆիքսված մնա իր տեղում: Բայց մենք երբեմն այնքան «խելոք» ենք, որ մտածում ենք, որ ամրագոտին սխալ բան է... և ամրակապվելու տեղը մեզ դուրս ենք գցում մեքենայից (և, բնականաբար, տեղոմ մահանում):
Սա նման է պատերազմի ժամանակ Արցախում գիշերները և նույնիսկ խորը թիկունքում տեղի ունեցողին, երբ մարդիկ երթևեկում էին անջատած լուսարձակներով՝ հույս ունենալով, որ այդպես դրոնը իրենց չի տեսնի: Որևէ մեկը չէր բացատրում, որ ԱԹՍ-ն, միևնույն է, տեսնում է (ինֆրակարմիր և ջերմադիտարկման սարքով), փոխարենը իրեն չի տեսնում դիմացից երթևեկող ու նույն մտածողության արդյունքում լուսարձակներն անջատած վարորդը: Թիվը չգիտեմ, բայց խորը թիկունքի ճանապարհներին ավելի շատ մարդ զոհվել է գիշերային ճակատ-ճակատ վթարներից, քան նույն խորը թիկունքում ԱԹՍ-ների հարվածներից»: