«Շատ վրդովված եմ ընդդիմադիր պատգամավորների պահվածքից». Ռուբեն Մելիքյան

Իրավապաշտպան Ռուբեն Մելիքյանն այսօր՝ լրագրողների հետ զրույցի ժամանակ հայտարարեց, որ շատ վրդովված է խորհրդարանում ներկայացված ընդդիմադիր պատգամավորների պահվածքից:

Հիշեցնենք՝ ԱԺ-ում այսօր քննարկվեց և առաջին ընթերցմամբ ընդունվեց «ՀՀ դատական օրենսգիրք» սահմանադրական օրենքում փոփոխություններ և լրացումներ կատարելու մասին» օրենքի նախագիծը:

Մելիքյանը հայտարարեց, որ ընդդիմադիր պատգամավորներն այնտեղ ներկայացված չեն, որ միայն նախագծին դեմ հայտարարություններ անեն, այլ պետք է հստակ և լուրջ քայլեր անեին՝ ամեն կերպ խոչընդոտելով նախագծի քննարկմանը. «Ամբողջ աշխարհում տեսնում ենք. մարդիկ վեր են կենում, ամբիոն են գրավում ու ասում՝ մենք չենք թողնում, որ նիստ անեք: Շատ մեծ քանակով մարդիկ հիմա դա են պահանջում, ոչ թե՝ գալստուկով գալ, նստել, ինչ-որ հարցեր տալ ու դրանով ինչ-որ «գալոչկաներ» դնել»,- ասաց նա:

Անդրադառնալով նախագծի բուն էությանը՝ իրավապաշտպանը նշեց. «Սա խայտառակ բան է: Այս նախագիծը հնարավորություն է տալիս ուղիղ միջամտել արդարադատության իրականացմանը, փաստաբանների հնարավորություններն էապես սահմանափակվում են: Այս նախագծով, փաստորեն, ամեն մի դատավոր մի փաստաբան պետք է վարձի, իր կողքը դնի, որովհետև անընդհատ քաղաքացիները կարող են գնալ և դիմել ԲԴԽ, և դատարանը պետք է անընդհատ գա և ինչ-որ մեկի առջև բացատրի իր գործողությունները»: