«Արտահերթ ընտրությունները Կրեմլից թելադրված շտապողականություն են»․ Վահե Գասպարյան

«Սա ընդամենը համակարգի վերարտադրություն է, ուրիշ ոչինչ»,- այսօր՝ Ազգային-ժողովրդավարական բևեռի հանրահավաքի ժամանակ անդրադառնալով արտահերթ ընտրություններին՝ ասաց նախաձեռնության անդամ Վահե Գասպարյանը։

«Իրեն ընդդիմություն հռչակած 17-ը բացառում էր ընտրությունները Նիկոլ Փաշինյանի օրոք, մինչդեռ հիմա Վանեցյանը արդեն պատրաստ է մասնակցել ընտրություններին՝ նույնիսկ այն պարագայում, երբ Ալեն Սիմոնյանը խոսում է Նիկոլ Փաշինյանի հրաժարականից հետո նրա ժամանակավոր պաշտոնակատար լինելու մասին։ Վանեցյանին դա այլևս չի կաշկանդում։ Կլասիկ ընդդիմադիրը բացառում էր հին օրենսգրով ընտրությունների գնալը։ Հիմա ասում է, որ դրա ժամանակը չէ․ շտապ պետք են ընտրություններ՝ թեկուզ հին օրենսգրքով։ Կլասիկ ընդդիմադիրի կլասիկ պահվածք․․․ Ծառուկյանը բացառում է ընտրություններն առանց հրաժարականի, մինչդեռ այս ափալ-թափալ հանդիպումից հետո չի հիշում հրաժարականի մասին»,- հայտարարեց Գասպարյանը։

Վահե Գասպարյանի խոսքով՝ սա Կրեմլից թելադրված շտապողականություն են, որը, ըստ իրեն, ունի մեկ նպատակ՝ «վերարտադրել գաղութային համակարգը և կասեցնել ազգային զարթոնքը»։