Փաշինյանի հակասական հայտարարությունները Су-30ՍՄ-ների մասին

394

Կիրակի, 21 մարտի, 2021 թ., 19:39

ՀՀ վարչապետ Նիկոլ Փաշինյանի հայտարարությունը Սու-30ՍՄ կործանիչների հրթիռների բացակայության մասին հակասում է իր իսկ հայտարարություններին, որոնք նա արել էր 2020թ․-ի հուլիսին։

Երեկ, Արագածոտնի մարզի Օհանավան գյուղի բնակիչների հետ հանդիպման ժամանակ վարչապետն ասել էր, որ Հայաստանը Ռուսաստանից Սու-30ՍՄ կործանիչները գնել է առանց հրթիռների։

«Մեզ ասում են՝ ինչի՞ համար եք գնել ինքնաթիռները։ Այո, մենք ինքնաթիռները գնել ենք, դրանք մայիսին տեղ են հասել, և մենք չենք հասցրել պատերազմից առաջ գնել դրանց հրթիռները»,- ասել է Փաշինյանը։

Այնինչ 2020թ․-ի հուլիսին Փաշինյանն ինքն էր հայտարարել, որ ՀՀ ԶՈւ Սու-30ՍՄ բազմաֆունկցիոնալ կործանիչները զորավարժություններ են անցկացրել՝ խոցելով թիրախները «օդ-ցամաք» հրթիռներով և անգամ տեսանյութ էր հրապարակել։

«Մեր «Սու-30CM»-ները երեկ «մարտական խոցումով» առաջին վարժական թռիչքներն են իրականացրել՝ փորձարկելով երկինք-երկիր հրթիռները «գրոհային գործողության» համար։ Բոլոր թիրախները խոցվել են բարձր ճշգրտությամբ»,- գրել է Փաշինյանը։

Համապատասխան գրառումը հիմա էլ կա վարչապետի ֆեյսբուքյան էջում։