Հայաստանը դեմ է քվեարկել Սիրիայի հարցով ՄԱԿ-ի Մարդու իրավունքների խորհրդի բանաձևին

1087

Հինգշաբթի, 25 մարտի, 2021 թ., 20:52

Հայաստանը դեմ է քվեարկել ՄԱԿ-ի՝ Մարդու իրավունքների խորհրդի՝ Սիրիային վերաբերող բանաձևին, որ ընդունվել է մարտի 24-ին՝ Մեծ Բրիտանիայի, ԵՄ անդամ երկրների, Թուրքիայի, Հորդանանի, Քաթարի և Քուվեյթի նախաձեռնությամբ: Այս մասին հայտնում է ՏԱՍՍ-ը:

Ռուսական պատվիրակությունը, որ մասնակցում է Ժնևում ՄԱԿ-ի Մարդու իրավունքների խորհրդի 46-րդ նիստին, Սիրիայի վերաբերյալ բանաձևը գնահատել է «չափազանց կողմնակալ»: ՌԴ պատվիրակության անդամ Դմիտրի Վորոբյովը, ելույթ ունենալով, հայտարարել է, որ այս փաստաթուղթը չափազանց կողմնակալ է, կառուցված է չհիմնավորված շահարկումների և կեղծ դատողությունների վրա, խեղաթյուրում է իրականությունը և բացահայտ քաղաքականացված բնույթ ունի»:

Բացի Ռուսաստանից, այս բանաձևին դեմ են քվեարկել նաև Հայաստանը, Բոլիվիան, Վենեսուելան, Չինաստանն ու Կուբան: Չինաստանի ներկայացուցիչը ևս նկատել է՝ փաստաթղթի բովանդակությունն արդար ու օբյեկտիվ չէ:

«Նման բանաձևի նախագիծը չի նպաստի սիրիական հարցի քաղաքական լուծմանը, այն չի կարող թեթևացնել սիրիացի ժողովրդի տառապանքները»,- ասել է նա: