«Իսկ միգուցե սրա տակ ուրիշ բա՞ն կա թաքնված». Կարինե Հարությունյան

Լրագրող Կարինե Հարությունյանը ֆեյսբուքյան իր էջում գրել է. ««Պատերազմը ցույց տվեց, որ Մինսկի խմբի համանախագահները ձախողել են իրենց գործունեությունը: Նրանք կոչված էին և կոչված են ոչ միայն բարենպաստ մթնոլորտ ստեղծել բանակցությունների միջոցով հարցի կարգավորման համար, նրանք նաև պետք է բացառեին ռազմական լուծումները, իսկ սեպտեմբերի 27-ն ապացուցեց՝ իրենք ձախողել են իրենց այդ մանդատի ուղղությունը»: Սա ասել է ՀՀ արգործնախարարը:

Նախ՝ լավ է ասաց, թե չէ մենք էլ վեց ամիս գլուխ ենք կոտրում, թե պատերազմն ինչու եղավ:

Երկրորդ՝ եթե մտադիր եք Մինսկի խմբին վերջնականապես դուրս թողնել գործընթացներից (իրականում նույնն է, թե՝ ԱՄՆ-ին և Ֆրանսիային, քանի որ ռուսներն արդեն գլխավոր ասողի դերում են), դրանով կմիանաք, եթե չասենք՝ արդեն միացել եք, Ադրբեջանի և Թուրքիայի ծրագրին՝ հարցը լուծել իրենց ձևով: Գիտենք, որ սա եք ուզում, տեսնում ենք:

Մինսկի խումբն այդպիսին էր, որովհետև դո՛ւք էիք անգործունակ և ամուլ՝ նվազագույնը: Երկուսուկես տարում Նիկոլ Փաշինյանը ոչ մի առաջարկ չդրեց բանակցությունների սեղանին, այլ միայն դատարկամիտ, դիվանագիտությունից հեռու հայտարարություններ արեց: Ի՞նչ համարձակությամբ եք այսօր մեղադրում Մինսկի խմբին, երբ ինքներդ էիք Ղարաբաղի հարցի գերեզմանափորը: Իսկ միգուցե սրա տակ ուրիշ բա՞ն կա թաքնված. Մինսկի խմբում Թուրքիայի դերակատարությունն ակտիվացնելու հարցը»: