«Հայ հասարակությունը վերածվում է լարերի, որոնց վրա վիրտուոզ նվագում է Պեգովը». Հակոբ Բադալյան

Քաղաքական մեկնաբան Հակոբ Բադալյանը ֆեյսբուքյան իր էջում գրել է. «Հայկական համացանցում հիմա էլ աշխուժորեն տարածվում է Ռոբերտ Քոչարյանի մասին հայտնի Պեգովի գրառումը, թե ով էր խանգարում ջոկատ կազմել և գնալ կռվելու:

Նախ՝ Հայաստանի հանրությանը պետք է հետաքրքրեր հարցը, թե ո՞վ չի խանգարել Պեգովին «խորն ինտեգրված» լինել տեղի ունեցող ռազմական գործողություններում, հատկապես, երբ նա թե՛ այդ ընթացքում, թե՛ դրանից հետո տարբեր կարգի հայտարարություններով հարուցում է տեղեկատվա-քարոզչական ինտրիգներ:

Երբ այդ ինտրիգը Նիկոլ Փաշինյանի դեմ է՝ Պեգովին ինտենսիվ տարածում են, այսպես ասած, ընդդիմադիր շրջանակից, երբ այդ ինտրիգը հիմա էլ Ռոբերտ Քոչարյանի դեմ է, Պեգովին տարածում է Քոչարյանին «ընդդիմադիր» շրջանակը:

Այդպիսով հայ հասարակությունը, իր համար էլ թերևս աննկատ, վերածվում է լարերի, որոնց վրա վիրտուոզ նվագում է Պեգովը: Ընդ որում՝ նվագում է ոչ միայն Պեգովը: Կամ նվագում են ոչ միայն Պեգովով, այլ մի շարք այլ հայտնի դեմքերով, ընդ որում, պատերազմից էլ առաջ, ընդ որում, մատուցելով այդ ամենն իբրև հայ ժողովրդի մեծ բարեկամություն:

Ահռելի աշխատանք կա անելու, որպեսզի հայ ժողովուրդը դադարի լինել այլոց նվագարանների լարի կարգավիճակում»: