Կառավարությունը հաստատեց զինհաշմանդամներին աշխատանքի ընդունելու դեպքում գործատուին տրվող աջակցության նախագիծը

Կառավարությունը հաստատեց «Ռազմական գործողությունների հետևանքով վնասվածք (վիրավորում) ստացած և հաշմանդամություն ունեցող անձ ճանաչված նախկին զինծառայողների (նրանց հավասարեցված անձանց) աշխատանքի տեղավորման դեպքում գործատուին պետական աջակցության տրամադրման միջոցառումը»:

Աշխատանքի և սոցիալական հարցերի նախարար՝ Մեսրոպ Առաքելյանն ասաց, որ նախագծի նպատակն է խրախուսել և աջակցություն տրամադրել այն գործատուներին, ովքեր մայիսի 1-ից հետո աշխատանքային պայմանագիր կկնքեն ռազմական գործողությունների հետևանքով վնասվածք ստացած և հաշմանդամություն ունեցող անձ ճանաչված նախկին զինծառայողների և նրանց հավասարեցված անձանց հետ: «Առաջարկվում է աշխատանքի տեղավորված յուրաքանչյուր անձի մասով գործատուին տրամադրել առավելագույնը 100 հազար դրամի չափով աջակցություն եռամսյակի կտրվածքով՝ աշխատավարձից հաշվարկված և վճարված եկամտային հարկի համար: Ինչպես նաև, միանվագ փոխհատուցում՝ ոչ ավելի, քան 500 հազար դրամի չափով՝ աշխատատեղի հարմարեցման անհրաժեշտության դեպքում»,- ասաց նախարարը: