«Թուրք ատելու ու բարեկամ լինելու պոռոտախոսությունն ավարտվելու է այն պահին, երբ հյուսիսային ցարը որոշի». Գագիկ Քամալյան

Հրապարակախոս Գագիկ Քամալյանը ֆեյսբուքյան իր էջում գրել է․ «Ախր ձեր՝ թուրք ատելու ու բարեկամ լինելու պոռոտախոսությունը ավարտվելու է այն պահին, երբ հյուսիսային ցարը որոշի, որ պետք չէ հետայսու թուրքին ատել կամ բարեկամ լինել, որովհետեւ պետք է ճանապարհները բացվեն, կամ հակառակը մնան փակ, քանզի դա է թելադրում ԵԱՏՄ շահերը։
(Սա ի միջի այլոց)
Երբ Հայաստանում ապրողներն են խոսում ինչ-որ մեկին ատելու ու սիրելու մասին, դա հասկանալի է, որովհետև իրենք են կենսագործվում Հայաստանում ու բնական է՝ այդ ամենի պատասխանատուն իրենք են։ Բայց երբ իմ նման դրսում ապրողներն են կուրծք ծեծում թշնամի ու բարեկամ որոշելու հարցում, ա՛յ էդ մեկն արդեն անտանելի տհաճ է, անմարսելի, որովհետև էդ ո՞ւմ հաշվին եք քյանդրբազությամբ զբաղվում։
Ես լքել եմ Հայաստանը, և ձեզ ամենայն պատասխանտավությամբ ասում եմ, որ ՀՀ-ում ապրող ցանկացած մարդ, ինձանից հազար անգամ ավելի պիտանի ու պատասխանատու է ՀՀ ներկայի ու ապագայի համար, անկախ նրանից, թե ես ինչքան եմ սիրում Հայաստանը, հետաքրքրվում նրանով, գումար ուղարկում այնտեղ ապրող ծնողիս, միևնույն է, հայաստանցին շոշափում է տեղի քաղաքական իրականությունը, իսկ ես ապրում եմ այլ քաղաքական իրականության մեջ։
Սրանից պետք չէ վատ զգալ ու սկսել երեսով տալ այն ֆինանսական օգնությունը, որ ուղարկում եք Հայաստան, որովհետև դա քո հոգեվիճակից բխող ժեստ է, որը քեզ ոչ մի կերպ հայաստանյան իրականության պատաախանտու չի դարձնում։
Ասածներս դաժան է հնչում , դաժան է նաև ինձ համար, բայց սա է իրականությունը, որի մասին չէի կարող չխոսել»։